ბრედ პიტი

ვიკიპედიაშე
ბრედ პიტი

ბრედ პიტი
დაბადებაშ ჯოხო უილიამ ბრედ პიტი
დაბადებაშ აბანიშაუნი, ოკლაჰომა, ააშ
დებადჷ 18 ქირსეთუთა, 1963 (1963-12-18) (60 წანერი)
საქვარუა არტისტი, პროდუსერი
აკოქიმინჯალაშ წანეფი 1987–ასეშა
ალმასქუ(ეფი) ჯენიფერ ენისტონი (2000-2005)
ანჯელინა ჯოლი (2014-2016)
მასქერეფი ჯეინ ეტა (ჰილჰაუზი), უილიამ ელვინ პიტი

უილიამ ბრედლი „ბრედ“ პიტი (ინგლ. Brad Pitt; დ. 18 ქირსეთუთა, 1963) — ამერიკალი არტისტი დო პროდიუსერი. თინაქ პოპულარულქ იჸუ 1990-იან წანეფს, მუჟამსით მუსხირენ ჰოლივუდურ ფილმის აკათჷ. ბრედ პიტის 1995 წაანას რსულებურ მაჟირახარისმახ როლიშო ფილმის „ვითოჟირი ქია“ ირხველჷ ორქოშ გლობუსიშ ჯილდო დო ოსკარიშ ნომინაცია. პიტი მედიაშე აღიარებული რე, მუჭოთ ართ-ართი არძაშე მიკმაჭოფალი კოჩი. თიში ოწოხოლენი გურგინუა ჯენიფერ ენისტონწკჷმა დო ათეჟამიშ ურთიართობა ანჯელინა ჯოლიწკჷმა მოსოფელიშ მედიაშე ფართეთ ისინთუაფ. პიტს ჯოლწკჷმა ჸუნს ამშვი სქუა, ათაჸურეშე სუმი ბიოლოგიური. ჯოლწკჷმა ურთიართობაშ უკული, ნამუთ ჩინებული რე მუში ჩეჟქიმინჯალათ, პიტიქ უმოსო ჩერთჷ სოციალურ საქვარეფს.

ბიოგრაფია[რედაქტირაფა | წყუშ რედაქტირაფა]

პიტიქ დებადჷ შაუნეეშის, ოკლაჰომას, ჯეინ ეტაშ (ოშქაშე სკოლაშ კონსულტანტი) დო უილიამ ალვინ პიტიშ (ოხარგე მანქანეფიშ კომპანიაშ მინჯე) ფანიას. თინა ჯიმალეფწკჷმა დუგ დო დაწკჷმა ჯულიე ნილწკჷმა ართო, ირდუდჷ სპრინგფილდის, მისურის, სოდეთ თიში ფანიაქ თიშ უკული გინორთჷ, მუჟამსით პიტიქ გერჩქინდჷნ. პიტი ოხვამურო ირდუდ. თინა გურაფლენდ კიკაპოშ ოშქაშე სკოლას, სოდეთ თინა აქტიურო ოკათუდ დებატეფს, სპორტის, სტუდენტურ მართუალას დო თეატრის. უკულ თიქ გურაფა გაგინძორ მისურიშ უნივერსიტეტის, ჟურნალისტიკაშ ფაკულტეტის. თინა რე სიგმა ჩი-ჩ ჯიმალობაშ მაკათური.

1988-1993 წანეფი[რედაქტირაფა | წყუშ რედაქტირაფა]

1988 წანას, პიტიქ ილაჸაფუ მაართათ თარი როლი ფილმის „ბჟაშ წკურუმია განი“, სოდეთ თინა ლაჸაფენდ ახალი ამერიკალს, ნამუთ ფანიაქ მიდეჸონჷ ადრიატიკაშა თიშენ, ნამდა უწამალესკონ კანიშ ლახალაშენ. ფილმი გინოღალირი რე იუგოსლავიას, 1988 წანაშ ზახულს. ფილმიშ გინოღალეფი ითებუდ, მუჟამსით ლჷმაქ დიჭყჷ დო უმენტაშო გინოღალირი კადრეფს მედინჷ; ფილმიქ წანეფიშ უკულ გიშართჷ. პიტიქ უკული აკათჷ ოტელევიზიე ფილმის „ახალი ღურაშო?“, ფილმის პიტიქ ილაჸაფ ნარკომანი, ბილი კანტონი, პარტნიორობას ჯულიეტ ლიუისი უკინანდ.

პიტიქ პუბლიკაშ თოლ-ჸუჯი მიკიჭოფჷ მაჟირა ხარისხამი როლით ფილმის „თელმა დო ლუიზა“, სოდეთ თინა ლაჸაფენდ დჷმაშებუს, ნამუთ დემაჸალუ თელმაწკჷმა (ჯინა დეივისი). თიში ოჸოროფე სცენა დეივისწკჷმა, სოდეთ პიტი მიმალინებუნა წელს ჟიმოლე ტარკალე, კოვბოიშ ქუდის, მირჩქინჷ მუჭოთ „სიმბოლური“, ნამუთ შხირას მოწმენს დო ხურგუნს პიტის მუჭოთ „სექს სიმბოლოს“.

„თელმა დო ლუიზაშ“ უკული, პიტიქ კათრინ კინერწკჷმა დო ნიკ კეივწკჷმა ართო ილაჸაფუ ტომ დიკილიოშ ჭიჭე ბიუჯეტამი ფილმის „ჯონი სუედე“ (1991). თიქ არსულ უჩინებურ მეოცნებეშ როლი ნამუთ მიინჭაფუ ნამდა იჸუას ჩინებული როკერქ. „რგილი მოსოფელიშ“ (1992) უკულ პიტიქ ილაჸაფჷ რობერტ რედფორდიშ ფილმის „თექ, სოდეთ წყარმალუ მეურს“ 1992 წანას. 1993 წანას ილაჸაფ ფილმის „კალიფორნია“, სოდეთ თინა ლაჸაფენდ სერიული მაჸვილარიშ როლს, ჯულიეტ ლიუსწკჷმა დო დევიდ დუხოვნიწკჷმა ართო.

1994-2000 წანეფი[რედაქტირაფა | წყუშ რედაქტირაფა]

ბრედ პიტი, ჯორჯ კლუნი, მეტ დეიმონი, ენდი გარსია დო ჯულია რობერტსისტივენ სოდერბერგიშ ფილმ „ოუშენიშ ვითაართი მაჸალეშ“ არტისტეფი

1994 წანას პიტიქ ილაჸაფჷ ვამპირ ლუი დე პოინტე დუ ლაკიშ როლი, ანნ რაისიშ ნოველას „ინტერვიუ ვამპირწკჷმა“. მას უკინანდ 18-ო ოშწანურიშ ვამპირიშ როლიშ გასახიერება, მუშ გურშენით საათობით მიკორინუანდ გრიმიშ ღოლამას, თიშენ ნამდა თიში კანი ირო ჩე ჸოფედუკონ. პიტს უკინანდ წვანე კონტაქტური ლინზეფიშ დო ჩქვალეფიშ გილაღალა. პიტწკჷმა ართო ფილმის ოკათუდეს ტომ კრუზი, ანტონიო ბანდერასი, კრისტიან სლეიტერი დო 11 წანერი კირსტენ დანსტი. ათე ფილმიშ უკულ თიქ ილაჸაფჷ „დამორჩილიშ ლეგენდეფს“ (1994) დო „შკვითი“ (1995). „შკვითის“ პიტი ლაჸაფენდჷ მორგან ფრიმენწკჷმა ართო, თინეფი რდეს დეტექტივეფი, ნამუეფით გილათხოზჷდეს კევინ სპეისიშ გერგეზის, სერიულ მაჸვილარს. ათეშ უკულ პიტი ნომინირაფილი რდჷ ოსკარს, საუჯგუშო მაჟირახარისხამი როლშო ფილმის „12 ქია“ (1995).

1997 წანას, პიტიქ ილაჸაფჷ ჰარისონ ფორდიწკჷმა ართო ფილმის „ეშმაკიშ დორხველი“. პიტიქ არსულ IRA-შ ტერორისტიშ რორი დევანიშ როლი, სოდეთ თის აჸუ ირლანდიური აქცენტით ოჩიებელქ. თი წანას თის აჸუ ავსტრალიარი გვალასმაულარიშ ჰაინრიხ ჰარერიშ როლქ ოსრულებერქ, ფილმის „შკვითი წანა ტიბეტის“. პიტი თუთობათ ხანდენდ ათე როლიშო, თიწკჷმა ართო მალაჸაფე დევიდ თეუილწკჷმა ართო. ათე ფილმის გეშა, ჩინეთის ხეშულებაქ, პიტს დო თეულისს უვარეს ირიათო ჩინეთშა მიშულა.

1998 წანას პიტიქ არსულჷ თარი როლი, ფილმის „გეჩინებაფეთ ჯო ბლეკი“. ფილმიქ პიტის კინ მეჩ ანჯა ილაჸაფუკო სერ ენტონი ჰოპკინსწკჷმა ართო, ნამუწკჷმა ართო თიქ უკვე ილაჸაფ ფილმის „დამორჩილიშ ლეგენდეფი“. 1999 წანას პიტიქ ილაჸაფ ჩაკ პალანიკიშ ჩინებული რომანიშ ეკრანიზაციას „მალჷმორეფიშ კლუბი“.

2000 დო უკულიან წანეფი[რედაქტირაფა | წყუშ რედაქტირაფა]

ბრეტ პიტი ფილმიშ „კითხირიშ უკული ხათეშე დოჭვით“ პრემიერას

2001 წანას პიტიქ ილაჸაფჷ ფილმის „თხობელური ლაჸაფეფი“, სოდეთ თის პარტნიორალას უკინანდ ვეტერანი არტისტი რობერტ რედფორდი, ნამუთ თიში მაგურაფალიშ როლს არსულენდჷ. 2001 წანას პიტიქ ილაჸაფჷ მუშ დიდი ხანიშ მაჸალეწკჷმა ჯულია რობერტსწკჷმა ართო ფილმის „მექსიკარი“. წანაშ დალიას ათუ „ოუშენიშ ვითაართი მაჸალეშ“ გინოღალეფს კათინით; ფილმი წჷმარინუანს ხეახალშო ღოლამირ 1960 წანაშ ფილმის, ნამუსჷღ ფრენკ სინატრა ლაჸაფენდჷ.

ათეშ უკული თიქ მიარე ფილმის ილაჸაფუ, თინეფ შქას „ოუშენიშ 12 მაჸალე“, „ტროა“. 2005 წანას ილაჸაფ ფილმის „მისტერ დო მისის სმითეფი“, სოდეთ თის პარტნიორალას უკინანდ ანჯელინა ჯოლი. თინეფი დაქირებული მაჸვილარი ჩილ დო ქომონჯიშ როლს არსულენდეს.

2005 წანას პიტიქ პროდიუსერალა უღოლჷ დო ათე ბორჯის ილაჸაფუ თარი როლი ფილმის „ჯესი ჯეიმსიშ ჸვილუა“, მარა ფილმის 2007 წანაშახ ვეგშართინჷ. 2006 წანას პიტი რდჷ ოსკაროსანი ფილმ „ღურელეფიშ“ პროდიუსერი. თის ათე ფილმის ლეიტენანტ კოლინ სალივანიშ როლი ოკო ურსულებუდკო, მარა როლი მეტ დეიმონს დუთმჷ დო მუქ ქაკათჷ ფილმის „ბაბილონი“. პიტი ალეხანდრო გონსალეს ინიარიტუშ ფილმეფიშ მოჸოროფე რდჷ დო ათეშენ დეინტერესჷ ათე პროექტით. ფილმის თინა კეიტ ბლანშეტწკჷმა ართო ლაჸაფენდ. ფილმიქ მიპალუ ართი ოსკარი დო გვალო 7 ნომინაცია, ხოლო ნომინირაფილი რდჷ ორქოშ გლობუსის, თინეფ შქას ბრედ პიტი, მაჟირახარისხამი როლიშო.

პიჯული რინა[რედაქტირაფა | წყუშ რედაქტირაფა]

1980 დო 1990 წანეფს პიტი შხირას ხვადუდჷ თიწკჷმა ართო მალაჸაფე ოსურ ადამიერეფს. პიტი ხოლო ხვადუდჷ არტისტ სიინიტას დო თანდიე ნიუტონს. პიტი რე ვეგეტარიანალი.

გურგინუა ჯენიფერ ენისტონს[რედაქტირაფა | წყუშ რედაქტირაფა]

პიტიქ „მაჸალეეფიშ“ მურიცხის ჯენიფერ ენისტონს აუხვადჷ 1998 წანას დო თინეფიშ დიარაქ იჸუ მალიბუს, 2000 წანაშ 29 კვირკვეს. თინეფიშ ცერემონია კილერი რდჷ, ჟურნალეფს თინეფიშ დიარაშ ემასახალი ხვალე ართი სურათიქ იბეშტუ. გურგინუაშე მალას, პიტიქ უჩიულ დამიანი ინტერნაციონალს, ნამუთიქ გჷშაშქუ თიჯგურა მარწკინდი, ნამუთ ოგურგინეთ აჩუქ ბრედიქ ჯენიფერს, ჯოხონობათ „ბრედი დო ჯენიფერი“. პიტიშ ჰოიათ, მარწკინდი თიში მოფირქებული დიზაინით რდჷ ნაღოლემი დო თინა რდჷ ექსკლუზიური.

ჯენიფერიშ დო პიტიშ გურგინუაქ 4 წანას იჸუ, ათე ბორჯიშ გოძვენას შხირას რდჷ გოსიმაფილი თინეფიშ დათხიებაშენ. პიტიქ ჯენიფერს ოფიციალურო 2005 წანას დეთხუ. მუჟამსით პიტიშ დო ანისტონიშ გურგინუა უკვე ბოლო დღალეფს კოროცხჷნდჷნ, თინა დო არტისტი ანჯელინა ჯოლი გეკარკატეს არძაშოული სკანდალს, სოდეთ ანჯელინას შხირას იშინუანდეს მუჭოთ „შხვა ოსურს“.

ანისტონქ დათხიებაშენ გაცხადება 2005 წანაშ 25 მელახის მიშეღჷ, 2005 წანაშ 2 გჷმათუთას ოფიციალურო დეთხის პიტიქ დო ენისტონქ ართიანს.

ურთიართალა ანჯელინა ჯოლიწკჷმა[რედაქტირაფა | წყუშ რედაქტირაფა]

ართი თუთაშ უკული, თიშ უკული, მუთ ანისტონქ მიშეღჷ დოკუმენტი დათხიებაშენინ, 2005 წანაშ პირელს, პაპარაცეფიშე იჸუ გინოღალირქ სურათეფქ, ნამუეფით ადასურენდჷ თი ციორს, ნამუთ არსებენდჷ ბრედ პიტის დო ანჯელინა ჯოლიშ შქას. ფოტოეფს, ნამუეფქჷთ გიმიჩინჷ 500 000 დოლარონ, ნაძირეფი რდჷ პიტი, ჯოლი დო თიში სქუა მედოქსი წყარპიჯის, კენიას. ზარხულიშ გოძვენას, ჭკობას ირო უმოსო დო უმოსო შხირას ორწყედეს ართო, მუშ უკულით მედიაქ თინეფს „ბრანჯელინა“ გიოდუ. ჟირი თუთაშ უკული, პიტი დო ჯოლი უკვე პოზიორონდეს კამერეფიშ წოხოლე მუჭოთ ჭკობა.

2005 წანას, პიტი ჯოლის ქაჸუნჷ ეთიოპიაშა, სოდეთ ანჯელინაქ მაჟირა ბაღანა ეჭოფუ, ზაჰარა. 2006 წანაშ 11 ღურთუთას, ჯოლიქ ჟურნალ „პიპლზის“ დაუდასურჷ, ნამდა თინა რდჷ მონკათ პიტიშე. 2006 წანაშ 27 მესის, ჯოლიქ ქიანას მალინუ ძღაბი შაილო ნუველ ჯოლი პიტი. ჯოლიქ გინოჭყვიდჷ ბაღანაშ სურათეფი გჷმუჩამუდკონ, ვინდარო ბაღანე ღანკი რდჷკონ პაპარაცეფშო. ჟურნალ „პიპლზიქ“ 4 მილიონ დოლარშე უმოსი გინუგჷ სურათეფიშო, ბრიტანულ ჟურნალქ „ჰელოუქ“ 3,5 მილიონი დოლარი. გვალო თანხაქ 10 მილიონი დოლარი აკადგინჷ. ედომუშამი თანხა ჯოლი-პიტიშ ოჩეჟმოქიმინჯე ფონდის გინაჩჷ.

2007 წანაშ 15 მელახის, ჯოლიქ სქუათ ეჭოფჷ სუმი წანერი ბოში ვიეტნამიშე პაქს თიენ ჯოლი-პიტი.

მედიაშ არზით ჯოლი კინ რდჷ მონკათ, მუთ თიში გჷმორჩქინაქ 2008 წანაშ Independent Spirit Award-ს დანტკიცჷ. 2008 წანაშ 12 კვირკვეს, ჯოლიქ გარჩქინჷ ბოში დო ძღაბი, ჯოხოთ ნოქს ლეონ ჯოლი პიტი დო ვივიენ მარჩელინ ჯოლი პიტი. 2015 წანას ჭკობაქ ხოლო ართი ბოში, 2 წანერი მუსა ეჭოფჷ.[1]

ფილმოგრაფია[რედაქტირაფა | წყუშ რედაქტირაფა]

წანა მარგალურო ოდაბადური ჯოხოდვალა როლი
1988 ბჟაშ წკურუმია განი The Dark Side of the Sun რიკი
1991 თელმა დო ლუიზა Thelma & Louise ჯეი დი
1991 ჯონი სუედე Johnny Suede ჯონი სუედე
1992 რგილი მოსოფელი Cool World დეტექტივი ფრენკ ჰარისი
1992 თექ, სოდეთ წყარმალუ მეურს A River Runs Through It პოლი
1993 კალიფორნია Kalifornia ერლი გრეისი
1994 ინტერვიუ ვამპირწკჷმა Interview with the Vampire ლუი დე პოინტე დუ ლაკი
1994 დამორჩილიშ ლეგენდეფი Legends of the Fall ტრისტან ლუდლოუ
1995 შკვითი Se7en დევიდ მილსი
1996 ლურენჯეფი Sleepers მაიკლ სალივანი
1996 12 ქია 12 Monkeys ჯეფრი გოინსი
1997 ეშმაკიშ ორხველი The Devil's Own ფრანსის ოსტინ მაკქუაინი
1997 შკვითი წანა ტიბეტის Seven Years in Tibet ჰაინრიხ ჰარერი
1998 გეჩინებაფეთ ჯო ბლეკი Meet Joe Black ჯო ბლეკი
1999 მალჷმორეფიშ კლუბი Fight Club ტაილერ დერდენი
2000 დიდი ფსონი Snatch მაიკ ონილი
2001 თხობელური ლაჸაფეფი Spy Game ტომ ბიშოპი
2001 მექსიკარი The Mexican ჯერი ველბახი
2001 მაჸალეეფი Friends უილ კოლბერტი
2001 ოუშენიშ ვითაართი მაჸალე Ocean's Eleven რასტი რიანი
2002 რინტალეფი Jackass საკუთარი თავი
2004 ტროა Troy აქილევსი
2004 ოუშენიშ ვითოჟირი მაჸალე Ocean's Twelve რასტი რიანი
2005 მისტერ დო მისის სმითეფი Mr. & Mrs. Smith ჯონ სმითი
2006 ბაბილონი Babel რიჩარდ ჯონსი
2007 ჯესი ჯეიმსიშ ჸვილუა The Assassination of Jesse James by the Coward Robert Ford ჯესი ჯეიმსი
2008 კითხირიშ უკულ ხათეშე დოჭვით Burn After Reading ჩედ ფელდჰაიმერი
2008 ბენჯამინ პატონიშ უჩინებური ისტორია The Curious Case of Benjamin Button ბენჯამინ ბატონი
2009 გენაძახა ნაფეშერეფი Inglourious Basterds ლეიტენანტი ალდო რეინი
2011 ადამიერი, ნამუქჷთ ირფელი დოთირუ Moneyball ბილი ბინი
2011 რინაშ ჯა The Tree of Life მისტერ ო'ბრაიენი
2012 დოჸვილი რჩქალას Killing Them Softly ჯეკი კოგანი
2013 ჭკორალაშ 12 წანა 12 Years a Slave სემუელ ბასი
2013 ალმაჩამალი The Counselor ვესტრეი
2013 მოსოფელი ლჷმა Z World War Z გერი ლეინი
2014 რისხუა Fury სერჟანტი დენ კოლერი
2015 ზუღაშ პიჯის By the Sea როლანდი

რესურსეფი ინტერნეტის[რედაქტირაფა | წყუშ რედაქტირაფა]

ვიკიოწკარუეს? რე ხასჷლა თემაშენ:

სქოლიო[რედაქტირაფა | წყუშ რედაქტირაფა]