თურქული საგესქუო

ვიკიპედია-შე
Jump to navigation Jump to search
თურქული საგესქუოშ ინჯეფი

თურქული საგესქუომოსოფელიშ ართ-ართ უდინდარაში დო მიარეფერამი საგესქუოს ორხველჷ. ოსმალეთიშ იმპერიაშ საგესქუოქ ოშწანურეფიშ გარგვალებურ წჷმოძინელო ქეიტუ აზიური, ევროპული, კავკაციური, ბალკანური დო სქირონაშქაზუღური საგესქუოეფიშ საუჯგუშო ტრადიციეფი.

სიმიტი
ლაჰმაჯუნი შქაგურით

თურქული საგესქუოშ თარი პროდუქტეფი რე: ხორცი (უმენტაშო შხურიშ), ორზა, ზეითუნიშ ზეთი, ზეთიშხილი, ბადრიჟანი, ზაფანა, ხვარხვი, პამინდორი, ოსპი, იოგურტი, ჩე ჸვალი (თ.ჯ. ბეიაზ პეინირი) დო შხვ.

ადანა-ქებაბი
ბულგურიშ ფლავი

თურქული საგესქუო ხორცამი ინჯეფშე არძაშე პოპულარული რე ქაბაბი (კებაბ), ნამუშ ქიანაშ გვარობა რსებენს, სამანგათ ადანა კებაბი, ისლიმ კებაბი, დონერ-კებაბი, შიშ კებაბი დო თ.უ. ხორცის, შხირ შვანს, ორტვინულწჷკმა ართო ზადჷნა. თურქეთის აკეთენა ფარშამი ორზას ვარ-და ზაფანას, კარტოფილი დო ზაფანაწკჷმა ართო შუშელი ფარშიშ ჭვარჭვალიტეფი (კოფტე) დო თ.უ. თურქეფს დიდი პოპულარობათ რგებულენს წვენამეფი (ჩორბა), გიშაკერძაფილო — ჭითა ოსპიშ წვენამი, იოგურტიშ წვენამი დო შხვ.

თურქეთის მუკი-მუკი ოთხი ზუღა გოდგჷ, თეშენ ქიანას ხვეიანო რე ჩხომი დო ზუღაშ პროდუქტი.

გიშაკერძაფილო ეიოშანალი რე თურქული გემუანობა: ბაქლავა, კადაიფი, ჰალვა, რაჰათლუკუმი, სუთლაჩი დო შხვ. დესერტეფიშ ოზადალო შხვადოშხვა სქირე ხილს დო თხირობას ხვარენა: ლუღიშ, მარგულიშ, ფინიკიშ ჩილა, ქიშმიში, თხირი, ნეძი, ფსტა, ნუში, არაქისი, ქეშიუ დო თ.უ.

თურქული რინა გიოსიზმარაფალი რე ჩაიშ დო ყავაშ უმუშო. თურქეთს თარო უგემუანაში, არომატულ ჩაის სპეციალური, წელს გითოწიორელი მორჩილი ჭირქეფით შუნა. შურამ ყავას — ლინჯიშ ჯეზვეს ოფუნუანა. ტრადიციული თურქული ოშუმალი რე აირანი, ნამუთ იოგურტიშე იზადჷ დო გოსოფურო ჸუმენს ოხვარჷ.

ალკოჰოლური ოშუმალეფშე ძალამ პოპულარული რე რაკი - ანისულიშ არომატამი ონტკა, ნამუსჷთ წყარს წყორილო ვარ-და უწყორუო შუნა.

თურქული საგესქუოშ ონჯეფიშ მიარეფერუამობა დო ინჯეფიშ იდეალურო მეხუჯაფილი გემოეფი სუნელობაშ დოინალაფათ რე. თურქულ საგესქუოს აქტიურო ხვარენა ძირას, ზაფანას, ქონდარს, ჸვალმინთას, ჩვაჩვაბის (სუმახი), მიხაკის, დარიჩინს, ჸვინთელ პირს, სამშურეს დო შხვ.

ქობალი დო ქობალიშ ინჯეფი თურქული საგესქუოშ ნერძო იკოროცხჷ, თინეფი არძა ტრაპეზიშ უგურთუ ნორთი რე. ეკმეკი (ekmek)– რჩქვანელობური ჩე ქობალი, პიდე (pide)– ლავაში, სიმიტი (simit)– რგვალი კვარეფი კუნჟუტიშ კაკალეფით. მანტი (manti)– გიშაჭვილი ქადაშორი შქაგურით დო უკოროცხუ გვარობაშ ზელიშე ნაზადა, ნამუშათ ბორეკი უჯოხონა (borek).

თურქული ერუანული საგესქუოშ არძაშე უჯგუშო ჩინებული ინჯა ალბეთ ფლავი რე. არძაშე შხირას თის აკეთენა ორზაშე, მორო კანკალე აბანს ორზაშ მანგირობას ქობალკაკალიშ ღარღილი ბულგული თირანს, ვარ-და გჷშაკერძაფილი სახეშ ვერმიშელი სეჰრიე. თურქეფიშ თოლწონუათ, ფლავიშ ხარისხიშ თარი გჷმათანჯალი დეტალი რე ორზა.

გალერეა[რედაქტირაფა | წყუშ რედაქტირაფა]

რესურსეფი ინტერნეტის[რედაქტირაფა | წყუშ რედაქტირაფა]