მუჰამედ ნაჯიბულა
მუჰამედ ნაჯიბულა აჰმადზაი (პუშტუ/დარი. محمد نجیبالله احمدزی, დ. 6 მარაშინათუთა, 1947 — ღ. 27 ეკენია, 1996) — ავღანარი პოლიტიკოსი, ავღანეთიშ ოკათე დემოკრატიული პარტიაშ (აოდპ) გენერალური მელამოსე 1986-1992 წანეფს დო ავღანეთიშ პრეზიდენტი 1987-1992 წანეფს.
გურაფულენდჷ მედიცინას ქაბულიშ უნივერსიტეტის, მარა სპეციალობათ დღას ვაუმუშებუ. პოლიტიკათ ორდოიანი წანეფიშე დეინტერესჷ. საურიშ რევოლუციაშ უკულ დორსხუაფილი დემოკრატიული რესპუბლიკაშ თარობას უკინებუდჷ შხვადოშხვა პოსტეფი. ჰაფიზულა ამინიშ მართუალაშ ბორჯის ნინალენდჷ ავღანეთიშ ელჩო ირანს. სხუნუეთიშ ავღანეთიშა მიშაჭკირუაშ უკულ, ავღანეთიშა დირთჷ. ბაბრაქ ქარმალიშ მართუალაშ ბორჯის ნაჯიბულა ქუდარინეს სახენწჷფო უშქურანჯობაშ კომიტეტიშ (ხად) მადუდეთ. ნაჯიბულაშ ხემანჯღვერობათ, ხად-იქ გინირთჷ თარობაშ არძაშე უმოსო ეფექტური ორგანოთ. 1981 წანას ნაჯიბულაქ გინირთჷ ავღანეთიშ მამართალი პარტიაშ აოდპ-შ პოლიტბიუროშ დო უკულ სეკრეტარიატიშ მაკათურო. 1986 წანას მიხეილ გორბაჩოვიშ ინიციატივათ, გეგნარინეს ბაბრაქ ქარმალი. 1986 წანაშ 4 მესის, აოდპ-შ გენერალური მელამოსეთ გინირთჷ ნაჯიბულაქ.
მუჰამედ ნაჯიბულაშ მართუალაშ პერიოდის, სხუნუეთიქ ქიდიჭყჷ ავღანეთიშე ჯარეფიშ გიშაჸონაფა, მარა სხუნუეთი ავღანეთის იშენ ალურდჷ ფინანსურო, მუჟამსჷთ მოჯაჰიდეფიშ მოხვარას აგინძორენდეს ააშ დო პაკისტანი. ნაჯიბულა ოცადუდჷ შერიგაშ პოლიტიკაშ წარმებას, თიქ ქიდიჭყჷ დიალოგი მოჯაჰიდეფიწკჷმა, გაუქვჷ ართპარტიული სისტემა, თარობაშა გემშეჸონჷ შხვა პარტიეფიშ წჷმმარინაფალეფი, ხუჯი ქუდუკინჷ ავღანური ნაციონალიზმის, ისლამი გეგმაცხადჷ ოფიციალურო რელიგიათ, ქიანაშა დორთაშ ნება ქიმეჩჷ გინოხორაფილი ბიზნესმენეფს. ჸათე პოლიტიკას ნაჯიბულაშა პოპულარობა ვამუღალუ. მარაშინათუთაშ პუტჩიშ დო სსრრ-შ აკოცჷმაშ უკულ, ნაჯიბულაშ თარობაქ ხვალე ქუდოსქიდჷ ლჷმას, მოჯაჰიდეფიშ მეხჷ. 1992 წანას არყებულეფქ ნაჯიბულაშ თარობა ქუდახუეს. უკულ ნაჯიბულაქ ქაბულს, გოეროშ მისიაშ ტერიტორიას დიტყობუ, ჸათაქ თინა გეჸვენჯი ოთხი წანაშ გოძვენას ცხოვრენდჷ. 1996 წანას, მუჟამსჷთ თალიბეფქ ქაბული ქიდეკინესინჷ, ნაჯიბულა გოეროშ მისიაშ ტერიტორიაშე გეგმიჸონეს დო დოჸვილეს.