ჯორჯ პალადე

ჯორჯ ემილ პალადე
	ჯორჯ ემილ პალადე
	რუმ. George Emil Palade
	; ჯორჯ პალადე რუმინეთიშ ფოსტაშ მარკას
დაბადებაშ თარიღი:	19 გერგობათუთა, 1912
დაბადებაშ აბანი:	იასი, რუმინეთიშ ომაფე
ღურაშ თარიღი:	გჷმათუთა 8, 2008 (95 წანერი)
ღურაშ აბანი:	დელ-მარი, კალიფორნია, ააშ
მენოღალობა:	რუმინეთი; ააშ
ომენცარე სფერო:	ციტოლოგია
სამუშაშ აბანი :	ნიუ-იორკიშ უნივერსიტეტი; როკფელერიშ უნივერსიტეტი; იელიშ უნივერსიტეტი; კალიფორნიაშ უნივერსიტეტი (სან-დიეგო)
ალმა-მატერი:	ბუქარესტიშ ფარმაციაშ დო მედიცინაშ უნივერსიტეტი
ჯოხოშინელი მოგურაფეეფი:	გიუნტერ ბლობელი
ჯილდოეფი დო პრემიეფი:	ალბერტ ლასკერიშ პრემია (1966); გაირდნერიშ პრემია (1967); ლუიზა გროს ჰორვიციშ პრემია (1970); ნობელიშ პრემია ფიზიოლოგიას დო მედიცინას (1974); უილსონიშ მენდალი (1981); ომაფე საზოგადოებაშ მაკათური (1984); მენცარობაშ ერუანული მენდალი (1986)

ჯორჯ ემილ პალადე (ინგლ. George Emil Palade; დ. 19 გერგობათუთა, 1912, იასი, რუმინეთიშ ომაფე — ღ. 8 გჷმათუთა, 2008, დელ-მარი, კალიფორნია, ააშ) — ამერიკალი ციტოლოგი, ნობელიშ პრემიაშ ლაურეატი ფიზიოლოგიაშ დო მედიცინაშ დარგის (ალბერ კლოდი დო კრისტიან დე დიუვიწკჷმა ართო).

ბიოგრაფია

ჯორჯ ემილ პალადექ დებადჷ 1912 წანაშ 19 გერგობათუთას, რუმინეთიშ ნოღა იასის, ფილოლოგიაშ პროფესორიშ ფანიას. პალადე გურაფულენდჷ ბუქარესტიშ ფარმაციაშ დო მედიცინაშ უნივერსიტეტის, სოდეთ მიპალუ მედიცინაშ დოქტორიშ ხარისხი 1940 წანას. 1946 წანას გინორთჷ ამერიკაშა. ამერიკას პალადე მუშენდჷ ნიუ-იორკიშ უნივერსიტეტის, როკფელერიშ უნივერსიტეტის, იელიშ უნივერსიტეტის, კალიფორნიაშ უნივერსიტეტის (სან-დიეგო). 1973-1990 წანეფს პალადე რდჷ იელიშ უნივერსიტეტიშ მედიცინაშ სკოლაშ პროფესორი დო 1990-2008 წანეფს რდჷ კალიფორნიაშ უნივერსიტეტიშ პროფესორი. 1970 წანას ჯორჯ პალადეს გინოჩეს ლუიზა გროს ჰორვიციშ პრემია (რენატო დულბეკოწკჷმა ართო), 1966 წანას პალადექ მიპალუ ალბერტ ლასკერიშ პრემია, 1967 წანას გაირდნერიშ პრემია, 1974 წანას ნობელიშ პრემია, 1981 წანას უილსონიშ მენდალი. 1984 წანაშე ჯორჯ პალადე რდჷ ომაფე საზოგადოებაშ მაკათური. 1986 წანას გინოჩეს მენცარობაშ ერუანული მენდალი. ჯორჯ პალადე გიმირინუანდჷ ელექტრონულ მიკროსკოპის რიბოსომაშ, მიტოქონდრიაშ, ქლოროპლასტიშ, გოლჯიშ კომპლექსიშ დინახალენ სტრუქტურეფიშ დაგურაფალო. ჯორჯ პალადექ მუშ ექსპერიმენტეფით დანტკიცჷ ნამდა ენდოპლაზმური ბადე დო გოლჯიშ კომპლექსი ართო ფუნქციონირენა. ჯორჯ პალადეშ ჸათე დო შხვა ექსპერიმენტეფს დო ნახანდეფს უკულ გიარსხუ ამდღარ ციტოლოგიაქ. პალადე მერჩქინელ რე ართ-ართ უდიდაშ ციტოლოგო.

პერსონალური რინა

ჯორჯ პალადეშ ოსური რდჷ მერილინ ფარქუჰარი, კალიფორნიაშ უნივერსიტეტიშ (სან-დიეგო) ციტოლოგიაშ პროფესორი. ჸუნდეს ჟირი სკუა. ჯორჯ პალადექ ღურუ 2008 წანაშ 8 გჷმათუთას, კალიფორნიაშ ნოღა დელ-მარის.

ლიტერატურა

Singer, Manfred V (2003). „Legacy of a distinguished scientist: George E. Palade“. Pancreatology 3 (6): ხს. 518–9. DOI:10.1159/000076328. ISSN 1424-3903. PMID 14730177.
Tartakoff, Alan M (November 2002). „George Emil Palade: charismatic virtuoso of cell biology“. Nature Reviews Molecular Cell Biology 3 (11): ხს. 871–6. DOI:10.1038/nrm953. ISSN 1471-0072. PMID 12415304.
Motta, P M (2001). „George Emil Palade and Don Wayne Fawcett and the development of modern anatomy, histology and contemporary cell biology“. Italian Journal of Anatomy and Embryology 106 (2 Suppl 1): ხს. XXI–XXXVIII. ISSN 1122-6714. PMID 11730003.
Sabatini, D D (October 1999). „George E. Palade: charting the secretory pathway“. Trends in Cell Biology 9 (10): ხს. 413–7. DOI:10.1016/S0962-8924(99)01633-5. ISSN 0962-8924. PMID 10481180.

რესურსეფი ინტერნეტის

ჯორჯ პალადე Nobelprize.org-ის