აბაზეფი

ვიკიპედიაშე

აბაზეფი
ედომუშამი მახორობა
მეხ. 50 000
ნინეფი
აბაზური ნინა,რუსული ნინა
რელიგია
მუსლიმი-სუნიტეფი

აბაზეფი (დორხველი ჯოხო — აბაზა, აფხაზუროაშვი ) — აფხაზეფიშ ხოლას მოჯგირე კათა, ოხორანა რუსეთიშ ფედერაციას (1989 წანაშ მუნაჩამეფით 33 ვითოში კოჩი , ედომუშამი მუდანობა — 43 ვითოში კოჩი). ჯინჯიერო, დოხორინელი რენა ოორუე კავკაციას (ყარაჩაი-ჩერქეზეთის) — 27, 5 ვითოში კოჩი. მეხოლაფირო 10 ვითოში აბაზა ხოლო-ელახის (თურქეთის, სირიას, იორდანიას, ლიბანს) ოხორანს, სოდგათ თინეფი მუჰაჯირობაშ ჟამს, 1862-1864 წანეფს გინახორუეს. ხოლო-ელახის გინოხორელი აბაზეფიშ შანულამ ნორთიქ აფხაზეთშე დო ადიღეშე გინოხორელ მახორობაწკჷმა აკიშქუ. ოორუე კავკაციას აბაზეფიშ ოხორუ ტერიტორია აკმადგინანს დიდი დო ჭიჭე იენჯუგიშ, ყუბანიშ დო გუმიშ ოდუდეეფს. იჩიებუნა აბაზურ ნინაშა, ნამუთ ორხველჷ კავკაციური ნინეფიშ აფხაზურ-ადიღურ ანუ ოორუე-ბჟადალურ ბუნას.

ამდღანერ ტერიტორიას აბაზეფი XIV ოშწანურაშე ოხორანა, აბაზა კათაშ მაართა შურობუმუ დო ოხორუ აბანი ობჟათე კავკაცია, საქორთუოშ უჩა ზუღაშპიჯეთი, ამდღანერი აფხაზეთიშ ტერიტორია დო ადლერი - სოჭიშ აკანი რდჷ, თინეფი თი აფხაზეფიშ გამნარყეფი რენა, ნამუეფქჷთ XIV ოშწანურას აფხაზეთიშე ოორუე კავკაციაშა წყარმალუ ყუბანიშ ლეხერშა გინიხორეს დო ჟამიშ ულაწკჷმა გიჭყჷ მუჭოთ „აბაზა“ კათა. თინეფი ჟირი ეთნოგრაფიულ ბუნეფო ტაპანთარეფო დო აშხარალეფო ირთუნა, ტაპანთარეფი ყარაჩაი-ჩერქეზეთიშ 9 პუნქტის რენა დოხორინელი. თე ოფუტეეფიე: ფსიჟი, ყუბინა, ინჯიქ-ჩკუნი, ელბურგანი, ტაფანთა, აბაზი-ხაბლი, კარაპაღო, კრასნო-ვოსტოჩნოე, კოიდანი. აშხარალეფი გვალო 3 ოფუტეს (აულს) სტარო-კუვინსკოე, ნოვო-კუვინსკოესი დო აფსუას ოხორანა. აბაზეფი მუსლიმი სუნიტეფი რენა.

ლიტერატურა[რედაქტირაფა | წყუშ რედაქტირაფა]

ანჩაბაძე ზ., ქორთული სხუნუეფიშ ენციკლოპედია, ტ. 1, ხასჷლა 11, ქართი, 1975 წანა.

რესურსეფი ინტერნეტის[რედაქტირაფა | წყუშ რედაქტირაფა]

ანაიდ გოგორიანი, სოხუმი. აბაზეფი აფხაზეთშა ირთუნა, ჟურნალი „ლიბერალი“, 3 გერგობათუთა, 2009.