|
ზიტყვას „ვამეყ“ უღჷ შხვა შანულობეფი ხოლო, ქოძირით ვამეყ.
|
ვამეყ III დადიანი — ოდიშიშ თარი 1658-1660/1662 წწ., გიორგი ლიპარტიანიშ ქომოლსქუა. ლევან II დადიანიშ ღურაშ (1657) უკული ალექსანდრე III იმერეფიშ მაფაშ მოხვარათ, ხეშა ქეშიჸოთჷ ოდიშიშ სათაროშ ხვისტა დო დადიანიშ ტიტული. 1658 წანას, ბანძაწკჷმა დამარცხჷ მუში მანირზე ლიპარიტ III დადიანი. 1660 წანას, იმერეთიშ ომაფეს დოჭყაფილჷ დინოხლჷმას ქაკათჷ, ჟინოტეფიშ მოხვარათ ქჷდიჸუნუ ომაფეშ კაბეტი ნორთი დო მაფაშ ტიტულჷთ მიღჷ. თიშ სააწმარენჯოთ გილესქერჷ ქართლიშ მაფა ვახტანგ V-ქ, მარა საქმექ მორიგათ გეთჷ: ვახტანგ V-ს იმერეთიშ ომაფეშ ჟილენი ნორთიქ ქუდასქიდჷ, დოსქილადირი ნროთი — ვამეყ III დადიანს. თე ეკონიას მუში ცირასქუა ქართლიშ მაფაშ ქომოლსქუა არჩილიშა ქემუთხუაფუდუკო ოკო. თეშ შედეგო იმერეთიშ ომაფე არჩილიშ ხეშა გინმიშჷ. ვამეყ III დადიანს იმერეთი მუშო ოკოდჷ. თიქ პიჯალა აკარცჷ დო მუში ცირასქუა შხვას ქემიათხჷ. თეს ვახტანგ V-შ მაჟირა ლესქერუაქ მაჸუნჷ. ვამეყ III დადიანს იმერეთიშ დო ოდიშიშ ჟინოთაშ კაბეტი ნორთიქ გეგნუდირთჷ. თიქ დიო ოდიშის ქემიანჭჷ, მარა მუჟანსჷთ ოდიშიშ ჯიხაზურგეფჷთ ვახტანგ V-შ ლესქერქ გეჭოფჷნ, შონეშა ინტჷ. თიში ფანია ქართლიშ ლექსერქ ხეშა ქეშიჸოთჷ. ვახტანგ V-ქ ოდიშის ლევან II დადიანიშ ჯიმასქუა შამადავლე თარო ქჷდარინუ. ვამეყ III დადიანი შონეს ღალატით დოჸვილეს.
.svg)
