ჯოღორიშობურეფი (ლათ. Canidae) — ბჟაშუმუეფიშ ფანიაშ მახვამილაფარეფიშ რანწკიშ ჩხოლარი. თინეფიშ რსხულიშ სიგჷრძა 40 (ფენეკი) — 160 სმ (გერი), ომანგეთ მასა 2-80 კგ-შახ ანჭუ. უღჷნა მეტნარკას მუწოწვანდაფილი ნიჩვი, გოფირინაფილი ჸუჯეფი, გჷრძე დო თვიზალი კუდელი, მეტნარკას ლიბუ დო თვიზალი ბოწოწი, წოხოლენ თვათეფს 5-5 (გიმნარკი რე ყორყმელიშობური ჯოღორი, ნამუსჷთ 4-4 კითი უღუ), უკახალენს — 4-4 კითი, ჭყანიერი დო ლიბუ ჯღვალეფით. ჩინებული რე 15-შახ გვარი. საქორთუოს ხე 4 გვარობა: გერი, მელა, ტურა დო ენოტიშობური ჯოღორი (აკლიმატიზაფილი რე). გოფაჩილი რენა ირდიხას, ანტარქტიდაშ, ახალი ზელანდიაშ, მადაგასკარიშ, სულავესიშ დო კანკალე შხვა ოკიანური კოკეფიშ მოხ. ჭკომჷნა ჩხოლარეფს (კანკალე ჩანარს ხოლო). იმიარებჷნა წანმოწანაშე ართშა. ხანა 1-1 უნდღეურ ლაკვის. ჯოღორიშობურეფიშ უმენტაშობას ძვირფასი ბოწოწი უღუ. თინეფშე მიარეს სარგებელი მოუღუ ჭუკიშობური ქვერქუეფიშ მაჯილიკარო. კანკალე (გერი დო შხვ.) ზარალს მეთმიორინუანს ოკათე მეურნობას ჸუდეშ ჩხოლარეფით ჯილიკუათ.
