ვივიენ ლი

ვივიენ ლი
Vivien Leigh
ვივიენ ლი სკარლეტ ო'ჰარაშ როლს ფილმის „ბორიაშღალირეფი“ (1939)
ჯოხო დაბადება შვანს	ვივიან მერი ჰარტლი
მოღალობა	1935–1967
ბიოგრაფიული ჩინებეფი
დაბადებაშ თარიღი	5 გერგობათუთა, 1913
დაბადებაშ აბანი	დარჯილინგი, ბენგალი, ბრიტანეთიშ ინდოეთი
ღურაშ თარიღი	კვირკვე 8,, 1967 (53 წანერი)
ღურაშ აბანი	ლონდონი, ინგლისი
ნთხორუაშ აბანი	ფერნჰემი, სარი (ნაჭვ მარღვეს თიკერეიშ ტობას)
საქვარუა:	არტისტი
მენოღალობა	გოართოიანაფილი ომაფე
ერუანობა	ინგლისარი
მუმა	ერნესტ ჰარტლი
ნანა	გერტრუდ მერი ფრენსისი
ალმასქუ	ჰერბერტ ლი ჰოლმანი (გ. 1932; ჩეთხ. 1940) ლოურენს ოლივიე (გ. 1940; ჩეთხ. 1960)
სქუალეფი	სუზან ფარინგტონი
ჯილდოეფი:	2 ოსკარი საუჯგუშო არტისტ ოსურიშო

ვივიან მერი ოლივიე ((ინგლ. Vivian Mary Olivier; აზაპალაშ გვარი — ჰარტლი (Hartley); დ. 5 გერგობათუთა, 1913 — ღ. 8 კვირკვე, 1967), პროფესიულო ჩინებულ მუჭოთ ვივიენ ლი (ინგლ. Vivien Leigh), 1947 წანაშ უკულ უღუდჷ ლედი ოლივიეშ ტიტული) — თინა რდჷ ბრიტანალ ოსურ არტისტი, ნამუქჷთ დრამატული სკოლაშ თებაშ უკული, 1935 წანას ოთხ ფილმის მორჩილ როლეფ ილაჸაფჷ, 1937 წანას, ფილმის „Fire Over England“ უკვე თარ გერგეზ ოსურიშ როლ ილაჸაფჷ. ვივიენ ლიქ ჟირშა მიპალუ ოსკარი საუჯგუშო არტისტ ოსურიშო: სკარლეტ ო'ჰარა - „ბორიაშღალირეფი“ (1939) დო ბლანშ დიუბუა - „ტრამვაი ჯოხოთ კორინი“ (1951). ბლანშ დიუბუაშ როლ თიქ დუდშე ლონდონიშ ვესტ-ენდიშ თეატრის (1949) ილაჸაფჷ, ფილმიშ ვერსიაშენ თაშნეშე ვოლპიშ თას მიღჷ. 1963 წანას, ბროდვეიშ მუსიკალურ ვერსიას „Tovarich“, თიქ ტონიშ პრემია მიპალუ.

თიშ უმკუჯინალო, ნამჷ-და თიქ პოპულარობა მუჭოთ კინოარტისტიქ თეშ მიპალჷნ, ლი დუდშეშე სასცენო მარსულებერ რდჷ. მუშ 30-წანიან კარიერაშ განწეხანს, თინა ასახიერენდჷ როლეფს ნოელ კაუარდიშ დო ჯორჯ ბერნარდ შოუშ კომედიეფიშ გერგეზ ოსურეფშე; შექსპირიშ კლასიკურ პერსონაჟეფშა: ოფელია, კლეოპატრა, ჯულიეტა დო ლედი მაკბეთი. რინაშ ეკონია წანეფს, თიქ მუსხირენ ფილმის ხასიათობურ არტისტიშ ამპლუასჷთ მუკორჩქინდჷ. თიშ უმკუჯინალო, ნამჷ-და თიშ კარიერას უქიმინჯალაშ ბორჯეფჷთ რდჷნ, 1999 წანას ამერიკაშ კინოინსტიტუტიქ (AFI) ლი კლასიკურ ჰოლივუდიშ კინოშ მა-16 უკაბეტაშ ოსურ კინომურიცხო ქიმკიწონჷ. ვივიენ ლი ირო რდჷ ჩინებულ მუშ გიშაკერზაფილ სისქვამეთ, მარა თენა თიშო შხირას პრობლემა რდჷ. არტისტი ფირქენდჷ, ნამჷ-და თიშ ფიზიკურ მუნაჩემეფ აცილანდჷ, მუჭოთ არტისტინ თეშ, ჯარალუას სერიოზულო უჩინებუდესკონ.

თი ბორჯის ჯარალუას ლი ძალამ მეჭედელო რდჷ ასოცირებულ მუშ მაჟირა ალმასქუ, ლოურენს ოლივიეწკჷმა, ნამუსჷთ 1940-შე 1960 წანაშა ჩილო ეკუხედჷ. ლი დო ოლივიე ართო ოკათუდეს ანდა თეატრალურ დოდგუმას, სოდეთ ოლივიე შხირას რეჟისორიშ როლსჷთ რდჷ; თაშნეშე თინეფქ ართო სუმ ფილმის ილაჸაფეს. ვივიენ ლიქ მიპალჷ რეპუტაცია, მუჭოთ არტისტიქ, ნამუწკჷმა მუშობა უკაჭულ რდჷ. თეშ ბაძაძ შხირას თიშ ჭყანთხილუაშ დგომარობა რდჷ — რინაშ უმენტაშ ბირთიშ განწეხანს თინა ქრონიკულ ტუბერკულოზის ობურჯუდჷ. თე ლახარა პირველო 1940-იან წანეფიშ შქა ბორჯის დუდასურეს დო საბოლათ, 53 წანაშ ხანას, თიშ ღურაშ ბაძაძო გინირთჷ.

რესურსეფ ინტერნეტის

ვიკიოწკარუეს^? რე ხასჷლა თემაშენ:

ვივიენ ლი

• ვივიენ ლი — ბროდვეიშ ინტერნეტ მუნაჩემეფიშ ბაზას (IBDb) (ინგლისური)
• ვივიენ ლი — კინოფილმეფიშ ინტერნეტ მუნაჩემეფიშ ბაზას (ინგლისური)
• ვივიენ ლი TCM-იშ კინოფილმეფიშ მუნაჩემეფიშ ბაზას
• University of Bristol Theatre Collection, University of Bristol
• Australian National Library, photographs from Australian tour