სეპტიმიუს სევერუსი

	სეპტიმიუს სევერუსი; ლათ. Septimius Severus
	; სეპტიმიუს სევერუსიშ ალებასტრიშ დო მარმარილოშ ბიუსტი კაპიტოლიუმიშ მუზეუმს
რომიშ იმპერატორი
პოსტის გერინაშ ბორჯი
	9 პირელი, 193 წანა – 4 ფურთუთა, 211 წანა
წიმოხონი	დიდიუს იულიანუსი
მონძე	კარაკალა; გეტა
ნაღურა	ფურთუთა 4, 211 (65 წანერი); ებორაკუმი, ბრიტანეთი
მუმა	პუბლიუს სეპტიმიუს გეტა
ნანა	ფულვია პია
ალმასქუ	1. პაკცია მარციანა; 2. იულია დომნა
სქუალეფი	კარაკალა; გეტა
რელიგია	ჯვეშრომაული რელიგია

ლუციუს სეპტიმიუს სევერუსი (ლათ. Lucius Septimius Severus; დ. 11 პირელი, 145 — ღ. 4 ფურთუთა, 211) — რომიშ იმპერატორი 193-211 წანეფს.

დებადჷ ნოღა ლეპტის-მაგნას, დინდარი ეკვიტეფიშ ფანიას. მუმა პუნი ჸუნდუ, დიდა რომალი. სეპტიმიუსიშ მასქერული ნინა პუნიკური რდჷ. უკულ დიგურუ ლათინური დო ბერძენული. სევერუსის, იმპერატორეფიშ მარკუს ავრელიუსიშ დო კომოდუსიშ ბორჯის, უკინებუდჷ შხვადოშხვა ოურდუმე დო დიპლომატიური პოსტეფი. 190 წანას გინირთჷ კონსულო.

192 წანაშ 31 ქირსეთუთას დოჸვილეს კომოდუსი. ჸათე პერიოდიშო სევერუსი რდჷ ჟიმოლენი პანონიაშ მამართალი. კომოდუსიშ უკულ, 193 წანაშ 28 მელახის, პრეტორიანალეფიშ გვარდიაქ დოჸვილუ კომოდუსიშ გეჸვენჯი პერტინაქსი. უკულ, პრეტორიანალეფქ აუქციონშა გეგშეღეს იმპერატორიშ პოსტი, ნამუშ ჸიდირი შელებუ დიდიუს იულიანუსიქ. იულიანუსი გეგთარაგუ სევერუსიქ, თაშნეშე თიქ ორჯგინჷ იმპერატორობაშ შხვა პრეტენდენტეფს პესცენიუს ნიგერის დო კლოდიუს ალბინუსის.

ხეშულობაშ კონსოლიდაციაშ უკულ, სევერუსიქ წიმიჭყჷ ოურდუმე კამპანია პართიაშ მეხჷ. 197 წანას თიქ გეჭოფუ პართიაშ ნანანოღა ქტესიფონი დო გაფართინუ რომიშ იმპერიაშ ბჟაეიოლი სანძღოეფი წყარმალუ ტიგროსიშახ. სევერუსიქ, თაშნეშე გამანგარჷ არაბული ლიმესი არაბეთიშ პროვინციას. 202 წანას სევერუსი ოლიმუდჷ გარამანტეფს აფრიკას დო მავრეტანიას დო გეჭოფუ თინეფიშ ნანანოღა გარამა.

სევერუსიქ ავგუსტუსო (წორო-იმპერატორეფო) 198 დო 209 წანეფს წჷმარინუ მუში სქუალეფი კარაკალა დო გეტა. 208 წანას სევერუსიქ გემშეჭკირჷ ბრიტანეთიშა, გამანგარჷ ადრიანეშ კიდა დო ხეშა ქეშეჸოთუ ანტონინეშ კიდა. 209 წანას, 50,000-ანი არმიათ, გემშართჷ კალედონიაშ (ასეიანი შოტლანდია) ტერიტორიაშა. მარა მალას, 210 წანაშ ეკონიას, სევერუსის ქაღოლჷ ინფექციური ლახარაქ დო ჸათეშ გეშათ დოღურუ 211 წანაშ 4 ფურთუთას, ნოღა ებორაკუმს (ასეიანი იორკი). სევერუსიშ ღურაშ უკულ იმპერატორიშ ხვისტა ქიდეკინეს კარაკალაქ დო გეტაქ. სევერუსით დირსხუ სევერუსეფიშ დინასტიაქ, ნამუთ იმპერიაშ ეკონია დინასტია რდჷ მასუმა ოშწანურაშახ კრიზისიშახ.

ლიტერატურა[რედაქტირაფა | წყუშ რედაქტირაფა]

Birley, Anthony R. (1999) [1971]. Septimius Severus: The African Emperor. London: Routledge.
Grant, Michael (1996). The Severans: The Changed Roman Empire. London: Routledge.

სეპტიმიუს სევერუსი სევერუსეფიშ დინასტია დებადჷ: 145 ღურჷ: 211
წიმოხონი: დიდიუს იულიანუსი	იმპერატორი 193 –211 პესცენიუს ნიგერი (მონირზე, 193-194) კლოდიუს ალბინუსი (მონირზე, 193-197) კარაკალაწკჷმა ართო (198-211) გეტაწკჷმა ართო (209-211)	გეჸვენჯი: კარაკალა გეტა