დიდი ნეძი

ოფუტე
დიდი ნეძი
ქიანა	საქორთუო
აკანი	სამარგალო-ჟიმოლენი შონე
მუნიციპალიტეტი	ზუგდიდიშ მუნიციპალიტეტი
მაართა მოშინაფა	XVIII ოშწანურა
ზუღაშ დონეშე	15 მ
მახორობა	752 კოჩი 2014

დიდი ნეძი – ოფუტე საქორთუოს, სამარგალო-ჟიმოლენი შონეშ აკანიშ ზუგდიდიშ მუნიციპალიტეტის, ოდიშ–გურიაშ რზენს. წყარმალუ ჯუმიშ (ინგირწყარიშ კვარჩხანი ნოჸველა) კვარჩხანი ოძგაშე, ზუღაშ დონეშე 15 მეტრა, ზუგდიდიშე 15 კმ. ცხაცხუშე 5 კმ. 2014 წანაშ ეჭარუაშ მუნაჩემეფით ოფუტეს ოხორანს 752 ადამიერი.

ისტორია

ოფუტე დიდი ნეძიშ ტერიტორიაშ ჯინჯიერი ნორთი ტყათ ჸოფე დოფორილი. თექ, სოდეთ იდვალუაფუ ოფუტეშ ცენტრინ, გინოჩვე დიდი ნეძიშ ჯა. ოფუტეშ ჯოხოშ გოჭყაფათ თე ლეგენდას არსხუაფუ. დიდი ნეძიშ ელჷ-მოლუეფქ მოხუჯურქ იჸუ მეორინჯალათ დაკებული კათაშო. თინეფქ გოჭვარეს ტყაშ გარკვიებული ნორთი დო ოხორინალი ჯარგვალეფიშ გედგჷმა ქჷდიჭყეს. მახორობაშ მუდანობა ჭიეჭიეთ ირდუდჷ. მაართა ჩინებეფი, ოფუტეშენი გჷნოჩამათ XVIII ოშწანურაშ ლიაშე რჩქინდუ. ოფუტეშ ამაღალებურ აბანს, ნამუსჷთ „დიხაგუძუბას “ უძახუდესჷნ, გედგჷდ კრამიტით გინორთვილი ოხვამე, სოდეთ ხვადუდჷ წირუა–ხვამა. ოხვამეშ ოზეს დიდი ცაცხუშ ჯალეფი გინოჩვე, მუსხირენი ამდღა ხოლო გეჩანს სუკის. კომუნისტეფქ ხეშუულობაშა მულაშენო გჷნოჩეს ზოჯუა ოხვამე გაკურღვაფუდესკონ. ამდღა ნაოხვამუს ოფუტეშ სასაფულე რე. 1931 წანას ქიანას ქჷდიჭყჷ კოლექტივიზაციაქ. თე პროცესის, მუჭოთ ედომუშამი საქორთუოშ კუნთხუეფც დო ოფუტეეფც, უმკუჭვებუო ვართ თე ოფუტეს მუკურთუმჷ. ყაზაყეფი აძვილეს, კერძო დიხეფი კოლექტივშა გეგნუჩამუდესკონი ოართე ორგეფაფალო. კათას დუდშე გუჭირდჷ კოლექტივიშ კანონეფით რინაქ, მორო ჭიეჭიეთ ქიმიარჩქვანეს დო ოფუტეშ მახორობაქ აქტიურო ქაკათჷ კოლმეურნობაშ საქვარუას დო ხანდაშ გერგეზეფიშ ბრელი მაგალითი ქაძირეს ქიანას. დიდნეძარეფი მაართა მოსოფელიშ ლჷმასჷთ ნოკათუენა, ბრელქ მედინჷ, ნორთიქ დართჷ ოდაბადურ ოფუტეს დო ფანიეფც. 144 ბოშკოჩი ლჷმენდჷ შხვადოშხვა ფრონტის, თინეფშე 98-ქ გერგეზულო ქჷდანთხჷ ლჷმაშ ვეს. ოფუტეშ ცენტრის უკახალე ვადორთელეფიშ ობელისკიე გედგჷმილი.

ოფუტე დიდი ნეძის მაართა სკოლაქ 1894 წანას დირსხუ. თენა ორდჷ ოთხწანამი სკოლა. 1916 წანას თიქ გეგნიკეთჷ შქვითწანამი სკოლათ, ოდო 1920–1921 წანეფს ჩხოროკლასამი სკოლათ. 1958 წანას ოფუტეშ ჯარალუაშით დო განათლებაშ ომინისტრეშ ალარინათ გეგნიკეთჷ ოშქარი სკოლათ. წანეფიშ გოძვენას გურაფა–ერდუალაშ საქვარს ხემანჯღვერენდეს ღვაწქუნილი დირექტორეფი: სპირიდონ ჯანჯღავა, პეტრე წურწუმია, ერასტო როდონაია, აპალონ ჩილაჩავა, ივანე გერგედავა, უშანგი ხაინდრავა, ვალერიანე ჯღამაია, ვერა კობახიძე, გერმანე ფაცაცია, ბონდო კუკავა, აპალონ ქარჩავა, მურადი ქირია, მარიეტა ჯობავა.

ოფუტე ამდღა

დიდინეძარეფი აქტიურო მეთხოზჷნა ქიანაშ რინაშ რიტმის. ბრელი თინეფშეიანქ ოფუტეს ჯოხო გუჸოთჷ. ოფუტეშ მინალჷწკჷმა წიმინდე გერგიშ ჯოხონობაშ მუმალეფიშ მონასტერიე, ნამუქუთ დიდი ნეძიშ ოპეკური სქუაშ, ბორის კუკავაშ სპონსორობათ დიკიდჷ. მონასტერი წჷმარინუანს ახალმორდუეფიშ შურიელი დო ზნეობაშური ერდუალაშ შანულამ კერას.

გჷმორინაფილი ლიტერატურა

ზუგდიდიშ მუნიციპალიტეტიშ გამგეობაშ ვებ-ხასჷლა Archived 2013-04-11 ვებ-ხასჷლას Wayback Machine.