შამგონა
შამგონა – ოფუტე საქორთუოს, სამარგალო-ჟიმოლენი შონეშ აკანიშ ზუგდიდიშ მუნიციპალიტეტის. თინა წყარმალუ ინგირწყარს დო რუხწყარი შქას მადვალუ საქორთუოს ხვალახე კოკი რე. 2014 წანაშ ეჭარუაშ მუნაჩემეფით ოფუტეს ოხორანს 1605 ადამიერი.
შამგონა ომძღჷ გალის რაიონიშ ოფუტეეფს - სიდას დო თაგილონს. თე ჭიჭე კოკიქ XVII ოშწანურაშ გვერდის წყარალაშ მოღალუოთ გიჭყუ. ოწმახ შამგონაშ ტერიტორია ჩქონს წჷმმარინუანდუ. კინოხ კოკი დოფორილი ჸოფე ტყათ დო უნაჸოფო ბინეხით, ნამუსჷთ "შამგუს" უძახუდეს. ბინეხიშ ჯოხოდვალაშ მეჯინათ "შამგონაშ" ჯოხოქ გიადუ.
კოკის მახორობაქ XVII ოშწანურაშ ლიას გორჩქინდ. გინოჩამათ პირველი მახორუ გვარო მიჯგვარია ჸოფედ. XVIII–ოშწანურაშ შქა ფარანეფს დირსხუ ოხვამექ, ნამუთ უკულნეშის ართ–ართი წყარალაშ ბორჯის აკოცუმე. ოხვამექ კინე დიკიდუ ოფუტეშ სასაფულეშ ტერიტორიას.
| ||||||||||