იოახიმ ფონ რიბენტროპი

ვიკიპედიაშე
იოახიმ ფონ რიბენტროპი
იოახიმ ფონ რიბენტროპი
გერმანიაშ 15-ა გალენური საქვარეფიშ მინისტრი
პოსტის გერინაშ ბორჯი
4 ფურთუთა, 1938 – 30 პირელი, 1945
წიმოხონიკონსტანტინ ფონ ნეირატი
მონძეარტურ ზეის-ინკვარტი

დუნაბადი30 პირელი, 1893
ვეზელი, გერმანიაშ იმპერია
ნაღურაგჷმათუთა 16, 1946 (53 წანერი)
ნიურნბერგი, გერმანია
მენოღალობაგერმანიაშ იმპერია
ერუანობაგერმანალი
პოლიტიკური პარტიანსდაპ
მუმარიხარდ ულრიხ ფრიდრიხ იოახიმ რიბენტროპი
ნანაიოჰანა სოფი ჰარტვიგი
ალმასქუანა ელიზაბეთ (ანელიზ) ჰენკელი (1920)
სქუალეფიქომოლსქუალეფი: რუდოლფი, ადოლფი დო ბართოლდი
ცირასქუალეფი: ბეტინა დო ურსულა
პროფესიაბიზნესმენი, დიპლომატი
ხეშმოჭარუა

ულრიხ ფრიდრიხ ვილი იოახიმ ფონ რიბენტროპი (გერმ. Ullrich Friedrich Willy Joachim von Ribbentrop; დ. 30 პირელი, 1893, ვეზელი, გერმანია — ღ. 16 გჷმათუთა, 1946, ნიურნბერგი) — ნაცისტური გერმანიაშ გოლინამი პოლიტიკური მოღალე დო გალენური საქვარეფიშ მინისტრი 1938-1945 წანეფს.

ბიოგრაფია[რედაქტირაფა | წყუშ რედაქტირაფა]

რიბენტროპიქ დებადჷ ოფიცერი, რიხარდ ულრიხ ფრიდრიხ იოახიმ რიბენტროპიშ დო თიში ალმასქუ, იოჰანა სოფი ჰარტვიგიშ ფანიას. დაჭყაფური სასკოლე გონათუა გერმანიაშ დო შვეიცარიაშ კერზო სკოლეფს მიღჷ, სოდე ჯგირო ქჷდიგურუ ინგლისური დო ფრანგული ნინეფი. 1908 წანაშე მიარეს შარალენდჷ ხურგაშგალე. 1910–1914 წანეფს თარო კანადას ოხორანდჷ, სოდეც გერმანული ღვინეფიშ იმპორტით რდჷ დოკაფილი.

მაართა მოსოფელიშ ლჷმაშ დოჭყაფაშე რიბენტროპიქ დირთჷ გერმანიაშა დო ბჟადალიშ ფრონტის იბურჯუდჷ. ბურჯაფის გიშარჩქინელი ქომოლობაშენ თინა დაჯილდეს 1-ა ხარისხიშ რკინაშ ჯვარით დო მიაჩჷ ობერლეიტენანტიშ წოდებაქ. 1916 წანას, ფრონტის მეღებული ნაჭყოლაშ გეშა რიბენტროპი გეგნიჸონეს გერმანიაშ საელჩეშა, ნოღა სტამბოლშა, შტაბიშ ოფიცერიშ პოსტიშა. თაქ რიბენტროპიქ გიჩინებაფჷ დო დემაჸალჷ ფრანც ფონ პაპენს.

1920 წანას, რიბენტროპიქ დეგურგინჷ ანა ელიზაბეთ (ანელიზ) ჰენკელშა, ნამუთ ჩინებული შამპანური ღვინეფიშ (Henkell & Söhnlein KG) ფაბრიკანტიშ ცირასქუა რდჷ დო თე ფირმაშ ბერლინიშ გჷმნართიშ დირექტორო გჷნირთჷ. 1925 წანას, ულრიხი სქუათ გეჭოფჷ შორიშ მოჯგირე გერტრუდ ფონ რიბბენტროპიქ, ნამუთ რიბეტროპეფიშ საგვარეულოშ გოჟინოთალერ ჸას ორხველუდჷ ანწიანშე იოახიმი მუში გვარს წჷმი აწმუნჯღვერს „ფონ“-ს (von) დო ჯოხოიდვალუაფუ „ფონ რიბენტროპო“. 1932 წანას ჰიტლერიშ გოჩინებაფაშ უკული თიქ გემშართჷ ნაციონალ-სოციალისტურ პარტიაშა დო ჰიტლერს ხეს უნწყუნდჷ არხო კონტაქტიქ გოჭყაფას თიწკჷმა მეახოლაფირ დო დომაჸალაფირ შხუ მეწარმეეფი დო ფინანსისეფიშ წირეწკჷმა.

1933 წანას, ჰიტლერიშით თარობაშ კაბინეტიშ გჷმოქიმინუაშ ბორჯის, გალენური საქვარეფიშ მინისტრიშ პორტფელი, ნამუსჷთ რიბენტროპი მუშო ათმირჩქინანდჷ, ალფრედ როზენბეგის, მუჭოთ „ჯვეშ გვარდიალს“, ერგჷ. 1934 წანას, რიბენტროპი ქჷდარინეს „რაიხიშ თარობაშ გალენური პოლიტიკურ დო ანჯარიშ ენწყჷმაშ საქვარეფიშ ელმაჩამალო“. 1935 წანაშ მანგის, აწოკინელქ იჸუ „გერმანიაშ რაიხიშ საგანგე დო რსულნებამი ელჩიშ“ პოსტის. თე პოსტის რიბენტროპიშ გენთხაფილი ცადებეფით ქიჸუ „ინგლის-გერმანიაშ ოზეე პაქტიქ“, ნამუთ გერმანიას ნებას არზენდჷ ინგლისიშ ოზუღე ნძალეფიშ 1/3 მუდანობაშ ფლოტი ქოჸუნდუკონ. ართი წანაშ უკული, 1936 წანას, თიში ინიციატივათ გერმანიაქ დო იაპონიაქ ხე ქჷმაჭარეს „ანტიკომინტერნულ პაქტის“, ნამუშ ღანკი რდჷ თე ჟირი სახენწჷფოშ კოოპერაციაშ კომუნისტური ინტერნაციონალიშ (კომინტერნი) სააწმარენჯო ბურჯაფი. 1936 წანას, რიბენტროპი ქჷდარინეს გერმანიაშ ელჩო ლონდონს, ნამუთ 1938 წანაშახ უკებუდჷ.

1938 წანას, რიბენტროპი ქჷდარინეს რაიხიშ გალენური საქვარეფიშ მინისტრო. თიშ უკული, მუთ 1939 წანაშ მელახის ვერმახტიქ ჩეხოსლოვაკიაშა გემშართჷ ბრიტანეთიქ აქტიურ მუშობა ქჷდიჭყჷ ანტიგერმანული ბლოკიშ გაჭყაფალო. თარი აქცენტი გინოღალირი რდჷ სსრრ-შა, მორო ინგლისარეფიშ გაკვირინაფალო რიბენტროპიქ თიზჷმა მახუჯუ, ნამჷ-და 1939 წანაშ 23 მარაშნათუთას გერმანიაშ დო სსრრ-შ გალენურ საქვარეფიშ მინისტრეფქ, რიბენტროპიქ დო მოლოტოვქ, ხე ქჷმაჭარეს თ.ჯ. რიბენტროპ-მოლოტოვიშ პაქტის (გერმ. Hitler-Stalin-Pakt - ჰიტლერ-სტალინიშ პაქტი). პაქტი ითოლიშწორენდჷ ართმაჟირაშ უგუნთხაფალას 10 წანაშ გოძვენას, პოლონეთიშ ტერიტორიაშ გორთუალას გერმანიაშ დო სსრრ-შ შქას დო სსრრ-შ ნეიტრალიტეტის ბჟადალ ევროპას მიმალი ოურდუმე ოპერაციეფს. თე პაქტი რიბენტროპიშ დო ედომუშამი გერმანული დიპლომატიაშ დიდი გომორძგუალა რდჷ.

რიბენტროპი ნიურნბერგიშ ტრიბუნალს (მაართა რანწკი, კვარჩხიშე მასუმა)

მაჟირა მოსოფელიშ ლჷმაშ პერიოდის, გალენური საქვარეფიშ სამინისტრე მიმალი მოლინეფიშ უკახალენი პლანს ქჷმოხვადჷ დო თიშ გეშა, ნამჷ-და ქალუტებუდუკო ჯვეში გოლინა ნაცისტურ ელიტა რიბენტროპიქ დორხველი სამინისტრეს კადრეფი სს-იშ მაკათურეფით გაფშჷ. თიშ გეშა, ნამჷ-და დოჸუნაფილი ქიანეფიშ მახორობაშ საქვარეფი გალენურ საქვარეფიშ ომინისტრეშ დოჸუნალობაშა მიშმეშჷნ, სს-არეფი მუშჸურე ირნერი აწორინალაშ უმუშო უნარღელჸვენდეს დოჸუნაფილი ტერიტორიეფშე ურიეფიშ დეპორტაციას ოკონცენტრაციე კარეეფშა. თექ ლჷმაშ თებაშ უკული რიბენტროპიშ ნიურნბერგიშ პროცესის თარი დჷმაშებუეფიშ ერკებულშა მოხვამილაფაშ ბაძაძო გჷნირთჷ. 218 დღამი ნაკვერუაშ პერიოდის რიბენტროპის მუთუნნერი ნარღიშ გინაფა ვაგჷმურჩქინუ დო 1946 წანაშ 1 გჷმათუთას მორსხუეეფიშ ოურდუმე ტრიბუნალქ თის გჷთოშქვიდაფა მეუსაჯჷ. განარჩქინქ ირსულინჷ ნიურნბერგიშ ოხვილაშეს 1946 წანაშ 16 გჷმათუთას შქა სერით 1 სათის.

რიბენტროპიშ ეკონია ზიტყვეფი რდჷ:

ღორონთი დოთხილე გერმანია. ჩქიმი ეკონია კორინი რე ქჷდოსქიდას გერმანიაშ ართოიანობაქ დო ბჟაეიოლიშ დო ბჟადალიშ შქას ართმაჟირაშ გაგებათ მოსოფელს თინჩალაქ იჸუასჷნ.
გერმ. — Gott schütze Deutschland. Mein letzter Wunsch ist, dass Deutschlands Einheit erhalten bleibt und die Verständigung zwischen Ost und West für den Frieden der Welt kommt.

ლიტერატურა[რედაქტირაფა | წყუშ რედაქტირაფა]

  • Bloch, Michael. Ribbentrop. New York: Crown Publishing, 1992. ISBN 0-517-59310-6.
  • Browning, Christopher R. The Final Solution and the German Foreign Office: A Study of Referat D III of Abteilung Deutschland, 194–43. New York: Holmes & Meier, 1978. ISBN 0-8419-0403-0.
  • Craig, Gordon. "The German Foreign Office from Neurath to Ribbentrop" in Gordon A. Craig and Felix Gilbert (eds.) The Diplomats 1919–39. Princeton: Princeton University Press, 1953, pp. 406–436.
  • Hildebrand, Klaus. The Foreign Policy of the Third Reich, Anthony Fothergill (trans.). London: Batsford, 1973. ISBN 0-520-02528-8.
  • Hillgruber, Andreas. Germany and the Two World Wars, William C. Kirby (trans.). Cambridge, Massachusetts: Harvard University Press, 1981. ISBN 0-674-35321-8.

რესურსეფი ინტერნეტის[რედაქტირაფა | წყუშ რედაქტირაფა]