ბერძენულ-ბაქტრიული ომაფე
|
ბერძენულ-ბაქტრიული ომაფე | ||||
| ||||
|---|---|---|---|---|
 ბერძენულ-ბაქტრიული ომაფე დოხოლაფირო ჯვ. წ. 170 წანას, ევკრატიდე I-შ მართუალაშ ბორჯის | ||||
| ნანანოღა | ბაქტრა აი-ხანუმი | |||
| ნინა | ბერძენული (ოფიციალური), ბაქტრიული, სანსკრიტი, არამეული, სოღდური, პართიული | |||
| რელიგია | ბერძენული პოლითეიზმი გრეკო-ბუდიზმი ზოროასტრიზმი | |||
| ფართობი | 2,500,000 კმ² (ჯვ. წ. 184) | |||
| დუდალაშ ფორმა | ელინისტური მონარქია | |||
| ბასილევსი | ||||
| - ჯვ.წ. 256-239 | დიოდოტე I (მაართა) | |||
| - ჯვ.წ. 117-100 | ჰელიოკლე I (ეკონია) | |||
ბერძენულ-ბაქტრიული ომაფე (ბერძ. Βασιλεία τῆς Βακτριανῆς) — ელინისტური პერიოდიშ ბერძენული სახენწჷფო ცენტრალური აზიას. ტერიტორიული ექსპანსიაშ პიკის ომაფე იკათუანდჷ თეხანური ავღანეთიშ, ტაჯიკეთიშ, უზბეკეთიშ დო თურქმენეთიშ ტერიტორიეფს, ბორჯიშ კუნტა პერიოდიშ გოძვენას ბერძენულ-ბაქტრიული ომაფეშ აკოდგინალაშა მიშმეშჷ თეხანური ყაზახეთიშ, პაკისტანიშ დო ირანიშ ნორთეფი ხოლო.
ბაქტრიას ჯვეში ბერძენეფი ჯვ. წ. მახუთა ოშწანურაშე ოხორანდეს. ჯვ. წ. 327 წანას ალექსანდრე მაკედონარქ ქიდიჸუნუ რეგიონი, ქუდარსხუ ნოღეფი დო კაბეტი მუდანობათ ბერძენეფი დო მაკედონარეფი ქუდახორუ. ალექსანდრეშ ღურაშ უკულ ბაქტრიაშ კონტროლქ გეგნორთჷ სელევკე I ნიკატორიშა, ნამუთ ალექსანდრეშ ართ-ართი გოლინიანი დიადოქოსი რდჷ. ბაქტრიაშ მუჭოთ ზოხორინელი სახენწჷფოშ გოჭყაფა მერსხილი რე დიოდოტე I-წკჷმა. თინა დუდშე ბაქტრიაშ სატრაპი რდჷ, მარა ჯვ. წ. 255 წანაშო თიქ, სელევკიდეფიშ იმპერიაშე ზოხორინელო გინირთჷ. ჸათაშ გიჭყჷ დუდიშული ბერძენულ-ბაქტრიული სახენწჷფოქ. თიში მაართა მაფათ დიოდოტე რე მერჩქინელი. ჯვ. წ. 250 წანას, ბაქტრიაშა გემშეჭკირჷ პართიაშ მაფა არშაკ I-ქ, მარა დიოდოტექ თინა დამარცხჷ დო თიში აკოანჯარაფილი ნძალეფი ბაქტრიაშ ტერიტორიაშე გეგშარაჸუ. უკულ დიოდოტექ მუში მონეტა ხოლო მოჭკირჷ. თიში მაფობაშ ბორჯის, ბაქტრია წჷმოძინელი დო ჸონიერი სახენწჷფოს წჷმარინუანდჷ.
ჯვ. წ. 190-180 წანეფიშე ბაქტრიალი ბერძენეფქ შანულამო გენძალიერეს დო მაფა დემეტრიოს I-შ მანჯღვერალათ ოორუე-ბჟადალი ინდოეთიშა გემშეჭკირეს. ჸათე მიშაჭკირუაშ შედეგო გორჩქინდჷ ინდო-ბერძენული ომაფექ, ნამუთ ბერძენულ-ბაქტრიული ომაფეშ მონძე სახენწჷფოთ იკოროცხუ.
ბერძენულ-ბაქტრიული ომაფექ წჷმოძინეფიშ კონკას მიოჭირინუ მაფა ევკრატიდე I-შ მართუალაშ ბორჯის. ევკრატიდექ, ჯვ. წ. 171 წანას ქუდახუ მამართალი ევტიდემიდეფიშ დინასტია დო ხეშულობა მუქ ქაშეჸოთჷ ხეშა. ევკრატიდექ, უკულ გემშეჭკირჷ ინდოეთიშა, სოდეთ თინა წჷმოძინელო ოლიმუდჷ ინდო-ბერძენი მაფეფს. ევკრატიდეშ უკულ ბერძენულ-ბაქტრიული ომაფექ დოდაღარაფა ქიდიჭყჷ. ომაფეშ ჸოფაშო ეგზისტენციალური საფრთხეს წჷმარინუანდეს პართიალეფი დო გეგია კათეფი: საკეფი დო იუეჩჟეფი. პართიალეფიშ დო გეგია კათეფიშ მიშაჭკირუეფიშ შედეგო ბაქტრიაქ ძალამს დედაღარჷ დო ჸოფა გასურჷ დოხოლაფირო ჯვ. წ. 120 წანაშო.