დინორეშა გინულა

ბაჰრეინი

რსხილეფიშ რედაქტირაფა
ვიკიპედიაშე
ბაჰრეინიშ ომაფე
مملكة البحرين
ბაჰრეინი
ბაჰრეინიშ
ჰიმნი:  بحريننا  (ბაჰრაინონა)
"ჩქინი ბაჰრეინი"
ბაჰრეინიშ ორენი
ნანანოღა
(დო უკაბეტაშ ნოღა) 		მანამა

26°13′ ოორ. გ. 50°35′ ელ. გ. / 

ოფიციალურ ნინა(ეფი) არაბული[1]
რელიგია  (2021)[2]
თარობა უნიტარული გვერდო კონსტიტუციური მონარქია
 -  მაფა ჰამად იბნ ისა ალ-ჰალიფა
 -  მონძე მაფასქირი დო პრემიერ-მინისტრი სალმან იბნ ჰამად ალ-ხალიფა
ფართობი
 -  გვალო 786.8 კმ2 (173-ა[3])
მახორობა
 -  2020 ფასებათ 1,501,635 (149-ა)
 -  მეჭედალა 1,864 ად/კმ2 (მა-6)
ედპ (ჸუპ) 2024 ფასებათ
 -  გვალო $105.6 billion[4] (98-ო)
 -  ართ მახორუშე $65,345 
აგი (2023) 0.899 (მაღალი) (38-ო)
ვალუტა ბაჰრეინული დინარი (BHD)
ბორჯიშ ორტყაფუ (UTC+3)
ქიანაშ კოდი BHR
Internet TLD .bh
ოტელეფონე კოდი +973

ბაჰრეინი (არაბ. البحرين‎‎, აბანობურო æl bɑħˈreːn (ალ-ბაჰრაინ); ოფიციალურო ბაჰრეინიშ ომაფე (არაბ. مملكة البحرين‎‎ Mamlakat al-Baḥraynⓘ) — კოკი სახენწჷფო ობჟათე-ბჟადალ აზიას, იდვალუაფუ სპარსეთიშ ჸუჯის, კინე მუშ ჯოხოდვალაშ მორჩილი არქიპელაგის, ნამუთ აკმოდირთუ 50 ორთაშობური დო 33 ხელუანური კოკიშე, ნამუშ ცენტრი რე კოკი ბაჰრეინი, ნამუთ ქიანაშ ტერიტორიაშ მეხოლაფირო 83%-ის იკენს. ბაჰრეინი იდვალუაფუ კატარიშ დო საუდიშ არაბეთიშ ოორუე-ბჟაეიოლ წყარპიჯიშ შქას, ნამწკჷმა მერსხილი რე მაფა ფაჰდიშ ხინჯით. 2023 წანაშ მუნაჩემეფით, ქიანაშ მახორობა რე 1,501,635 ადამიერი, ნამუეფშე 712,362 (მახორობაშ 47%) ბაჰრეინალეფი რენა დო 789,273 — ექსპატრიატეფი 2,000 ეთნიკური დორხველუაშე (მახორობაშ 53%).[5] ბაჰრეინიშ ფართობი რე მეხოლაფირო 760 კმ2[6], სიკაბეტაშ მეჯინათ მასუმა ქიანა რე აზიას მალდივეფიშ დო სინგაპურიშ უკული, თაშნეშე არაბული ოქიანუშ არძაშე უჭიჭაში სახენწჷფო რე.[7] ნანანოღა დო უკაბეტაში ნოღა რე მანამა.

არქეოლოგი ჯეფრი გიბბიშ რაგადუათ, ბაჰრეინი ჯვეში ცივილიზაცია დილმუნიშ ორენი რე.[8] ჯვეში ბორჯიშე მოჸუნაფილი ჯოხოგოლაფირი რდჷ მირგატიშ ხერეჭუათ, ნამუთ მოსოფელს საუჯგუშოთ იკოროცხუდჷ XIX ოშწანურაშახ.[9] ბაჰრეინი რდჷ ართ-ართი თი რეგიონეფშე, ნამუეფშა გულა იღვენუ ისლამქ, დიო ხოლო მუჰამედიშ შურდგვენაშ ბორჯის, 628 წანას. არაბული გამაგალაშ ბორჯიშ უკული, 1521-1602 წანეფს ბაჰრეინი პორტუგალიაშ იმპერიაშ გამაგალაშ გიმე რდჷ, სოიშახ აბას I კაბეტიქ თინეფი ვეგნორაჸუ სეფიანეფიშ ირანშენ. 1783 წანას, ბანი უტბაქ დო მორსხუე თურეფქ ხეშა ქეშიჸოთეს ბაჰრეინი შეიხი ნასრ ალ-მადკურიშე, დო თი ბორჯიშე მოჸუნაფილი ქიანას გამაგენს ალ ხალიფაშ ომაფე დინასტია, აჰმედ ბინ მუჰამედ ბინ ხალიფაქ ბაჰრეინიშ პირველი ჰაკიმო გჷნირთუ.

XIX ოშწანურაშ დალიას, ბრიტანეთწკჷმა ანდა ხეკულუეფიშ დოდვალაშ უკული, ბაჰრეინქ გოართოაიანაფილი ომაფეშ პროტექტორატო გჷნირთუ.[10] 1971 წანას, ქიანაქ გეგმაცხადჷ ზოხორინალა. ბაჰრეინი, ნამუთ კინოხ რდჷ საამირონ, 2002 წანას, გეგმიცხადჷ გვერდო კონსტიტუციური მონარქიათ, კონსტიტუციაშ 2 ბირგული შარიათის აცხადენდჷ კანკნდვალუაშ თარი წყუთ. 2011 წანას, ქიანას მიშჷ პროტესტეფი, ნამუთ ახნარებული რდჷ რეგიონალური არაბული აფუნით.[11] გამაგე ომაფე ფანია ალ ხალიფა, ნამუთ აკმოდირთუ სუნიტი მუსლიმეფშე, აკრიტიკენა თიჯგურა ბუნეფიშოთ ადამიერიშ ნებეფიშ აკორცუაფაშენ მუჭომეფით რენა, დისიდენტეფი, პოლიტიკური ოპოზიცია დო მახორობაშ შიიტი მუსლიმეფი.[12]

ბაჰრეინშა უჯოხონა სპარსეთიშ ჸუჯიშ ართ-ართი პირველი პოსტნაფთობური ეკონომიკა,[13] ნამუთ საბანკო დო ტურისტულ სექტორეფშა ვითწანობათ ინვესტიციეფიშ შედეგი რდჷ;[14] მოსოფელიშ ანდა კაბეტი ფინანსურ დჷნაწესებუეფს უღჷნა წჷმარინაფალა მანამას. ნაფთობშე მუშნაველეფი კჷნე თარი როლს ლაჸაფენა სახენწჷფო ბიუჯეტის. მოსოფელიშ ბანკიშით იკოროცხუ მაღალმუშნაველამი ეკონომიკათ. ბაჰრეინი გეჸვენჯი ორგანიზაციეფიშ მაკათური რე: გოერო, უგინობირაფუობაშ ყარაფი, არაბული ქიანეფიშ ლიგა, ისლამური წოროხანდაშ ორგანიზაცია დო სპარსეთიშ ჸუჯიშ არაბული ქიანეფიშ წოროხანდაშ სხუნუ.[15] შანხაიშ წოროხანდაშ ორგანიზაციაშ დიალოგიშ პარტნიორი რე.[16][17]

ჩქინ ფარანშახ III ვითოშწანურას, ბაჰრეინიშ ტერიტორიას გოფაჩილი რდჷ გოვითარაფილ ცივილიზაცია, ნამუშოთ დჷმახასიათაფალი რდჷ ინწრო მახორობა. უჯვეშაში სახენწჷფო, ნამუსჷთ ჯოხოდჷ დილმუნი, წჷმარინუანდჷ ოზუღე ვაჭარუაშ უშხუაშ ცენტრის, თაჸურეშე ართიანს მითმიარსხუაფუდეს შუმერეფი დო შქაწყარმალონაშ შხვა კათეფი ინდიშ ვეშ კათეფწჷკმა.

A 1745 Bellin ბაჰრეინიშ ისტორიული რეგიონიშ რუქა
  • IV—VI ოშწანურა — მიშმურს სასანიანეფიშ სახენწჷფოშა, უკული - არაბეფიშ ოხალიფეშა.
  • IX—XI ოშწანურა — კარმატეფიშ სახენწჷფოშ ცენტრი.
  • XIII ოშწანურაშ ოშქაშე — ეთმოჭფუნს ზოხორინალას, მარა მალას ორმუზეფიშ ემირატეფიშ ნორთიშა მიშმურს.
  • 1521 წანა—1602 წანა — პორტუგალიაშ დუდალაშ თუდო.
  • XVII—XVIII ოშწანურეფი — სეფემიდურ ირანიშ აკოდგინალუაშა მიშმურს.
  • 1780-იანეფი — კინე გჷმოცხადაფილიე ზოხორინალა.
  • XIX ოშწანურა — ბაჰრეინშა ინგლისარეფი მიშმულა.
  • 1871 წანა — დიდი ბრიტანეთი ბაჰრეინს პროტექტორატის ორსხუანს, მარა ფაქტიურო კოლონიათიე გინორთელი.
  • მაართა მოსოფელიშ ლჷმა — აკოქიმინელი რე ბრიტანეთიშ შხუ ოურდუმე ბაზა. ბაჰრეინი, ირანიშ თარობას მიოჩქჷ, უკანონეთ ეჭოფილი ირანიშ ტერიტორიათ.
  • მაჟირა მოსოფელიშ ლჷმა — ბრიტანეთიშ თარობა ბაჰრეინშა გინმიჸონანს შხუ მალჷმორ კონტიგენტეფს. 1946 წანაშე მანამა - ბრიტანეთიშ ადმინისტრაციაშ უნჩაშიშ რეზიდენცია სპარსეთიშ ჸუჯიშ რაიონს.
  • 1968 — ყატარწჷკმა ართო დო ომანწჷკმა აპიჯაფათ, აცხადენს სპარსეთიშ ჸუჯიშ არაბული ოხანეშ ფედერაციაშ აკოქიმინუას.
  • 14 მარაშინათუთა 1971 წანა — ეჭოფილი რე ზოხორინალა.
  • 1975 წანა — ქიანაშ პარლამენტიშ აკოფაჩუა.
  • 14 ფურთუთა 2011 წანა — ქიანას ქიდიჭყჷ მასიური ოკათე არყებეფქ, ნამუთ გიმიჭანუ ტუნისიშ დო ეგვიპტეშ რევოლუციეფქ. ახალ მასიურ ოპროტესტე აქციეფქ 2012 წანაშ დალიას დიჭყჷ.
არადიშ ჯიხა, ნ. არადი, ბაჰრეინი
ოპროტესტე აქცია ბაჰრეინს, 15 ფურთუთა 2011.

ქიანას დიპლომატიური რსხუ უღუ საქორთუოწჷკმა.

2007 წანაშ მუნაჩემეფით, ქიანაშ მახორობა 708 573 ვითოში კოჩი რდჷ, თაურეშე დოხოლაფირო გვერდი - მუშა-იმიგრანტეფი დო თინეფიშ ფანიაშ მაკათურეფიე, ნამუთ უმენტაშო ირანშე რენა მუნაულა. ქიანას, ევროპაშ დო ობჟათე აზიაშ ქიანეფიშ ბრელი მენოღალე ოხორანს. ოფიციალური ნინა - არაბული, თეწჷკმა ართო გიმირინუაფუ ინგლისური, ფარსი დო ურდუ.

დოხოლაფირო მახორობაშ 30%, 15 წანაშახ ხანიშ ბუნას აკმადგინაანს, 68% — 15-შე 65-შახ (თაჸურეშე 44% — ვარეზიდენტეფი რენა), 3,2% — 65 წანაშ ეკი. 2003 წანას დაბადება ლოგინელი რდჷ 19,02 1000 მახორუშო, ღურა — 3,99 1000 მახორუშო, იმიგრაცია — 1,07 1000 მახორუშო, მახორობაშ წარმოწანური ნაძინა ეკმადგინანს 1,61%. მახორობაშ თელარაშ ოშქაშე მუდანობა — 73,7 წანა, ქომოლკათა — 71,3 წანა დო ოსურკათა — 76,2 წანა. მახორობაშ ოშქაშე ხანი — 28,7 წანა (ქომოლკათეფი — 31,6, ოსურკათეფი— 25,1). ქიანაშ მახორობაშ მეჭედალა აკმადგინანს 1142,9 კოჩი/კმ²-ს. ქიანაშ ნანანოღა, ონიშოლე ნოღა მანამა (137 ვითოში მახორუ), იდვალუაფუ კოკი ბაჰრეინიშ ოორუე-ბჟაეიოლს, - შხუ ოვაჭარე ცენტრი (სუმშე, ართ-ართი დუდიშულური ოვაჭარე ზონა სპარსეთიშ ჸუჯიშ რაიონს).

ქიანაშ მახორობაშ დოხოლაფირო 80% სახენწჷფო რელიგიას — ისლამს გეჸუნს, თაჸურეშე 75% შიიტეფი დო 25% სუნიტეფი რენა (თენეფს ორხველჷ ქიანაშ მანჯღვერე ფანიაშ მაკათურეფი). მახორობაშ 10% ქირსიანეფი რენა, დოსქილადირი 10% — იუდეველეფი, ბაჰაისტეფი, ინდუსეფი, ბუდისტეფი დო ზოროასტრალეფი რენა.

სახენწჷფო მონწყუალა

[რედაქტირაფა | წყუშ რედაქტირაფა]
შეიხ ჰამად ბინ ისა ალ ხალიფა, ბაჰრეინიშ მაფა

ბაჰრეინი — კონსტიტუციური ომონძე მონარქია რე. სახენწჷფოშ მადუდე რე მაფა (2002 წანაშახ - ემირი). თარობაშ მანჯღვერი რე პრემიერ-მინისტრი. ოთარობე ომინისტრე კაბინეტი აკმოდირთუ 23 მინისტრიშე.

ქიანაშ პარლამენტი ჟირპალატიანი რე. გიმენ პალატა - მაკათურეფიშ პალატა ეშმიგორუაფუ ოირკოჩე ხონარიშ მეჩამათ, ჟიდონ პალატა - ოკონსტიტუციე რსხუს (მეჯლისი აშ-შურა) მაფა დჷთმარინუანს. ჟირხოლო პალატას 40 კოჩი რე. პოლიტიკური პარტიეფი ვაშინერს.

1932 წანას ნვთობიშ ობადიშ მეგორაფაშახ, ბაჰრეინიშ ეკონომიკაშ თარი ნორთი რდჷ მირგატიშ ჭოფუა (ნამუთ, ასე ხოლო, ართ-ართ თარ დარგო სკიდუ). ნავთობიშ ეშაღალა დო გინომუშება, წოხოლე ქიანაშ ედპ-შ 60% იკენდჷ, ასე - 30%-ს. ბაჰრეინიშ ,,უჩა ორქოშ" აბანდვალეფი რკებულენს. თეწკჷმა ართო, ქიანას ეშმიღალუაფუ დო გინმიმუშებუაფუ ორთაშობური გაზი, ნამუშ ნოზირეფი ირკენს. გოვითარაფილიე ოფშორული ობანკე ბიზნესი.

ქიანაშ ნანანოღას, მანამას მილარე ბრელი არაბული ტრანსნაციონალური კორპორაციეფიშ შტაბ-ორენჯი. ბაჰრეინს მეურს სუპერტანკერეფიშ რემონტეფი, თაქ რე ალუმინიშ ქარხანა (მადენი მითმიჭირინუაფუ ავსტრალიაშე).

მახორუეფს ოაზისეფს მოჸუნს ფინიკიშ პალმეფი (დამუშებული დიხაშ 2/3-ს იკენს), ციტრუსეფი, ხილი, პამინდორი, ლაიტი, ორტვინობა, თხირი. მახორუეფი, თეწჷკმა ართო, დაკებული რენა ჩხომიშ დო კრევეტეფიშ ჭოფუათ. ქიანას გოვითარაფილი რე ოერეფოშქაშე ტურიზმი.

ოექსპორტეთ ქიანაშე გინმუღუნა: ნავთობი დო ნავთობპროდუქტეფი, ალუმინი დო მირგატი.

ქიანაშ ხემანწყუე: ნავთობიშ დო გაზიშ ობადეფი. გოვითარაფილიე ოფშორული ობანკე სექტორი, დინოხოლენი ინვესტიციეფი, ტურიზმი, ალუმინიშ წარმება.

ქიანაშ დაღარი კუნთხუეფი: ნავთობიშ რეზერვეფიშ რკება, ეკონომიკაშ შხვა ნორთეფშა ორიენტირაფაშ ვაბაღება. უმუშელობაშ მაღალი დონე (15%) დო სახენწჷფოშ გალენი ვალი.

ქიანაშ ვალუტა — ბაჰრეინული დინარი, ომანგჷ 1000 ფილსამს.

ბაჰრეინიშ რუქა 2014
პლიაჟი მუჰარაქის, ბაჰრეინი

ბაჰრეინი მილარე 33 კოკის. ქიანას უკინებუ ბაჰრეინიშ არქიპელაგი, ნამუთ აკმოდირთუ 33 ცაწკვერტა კოკიშე. არძაშე უდიდაში კოკი რე ბაჰრეინი, ნამუთ ოორუეშე ობჟათეშახ გინოზინდილიე 50 კილომეტრის, ბჟადალშე ბჟაეიოლშახ - 15 კილომეტრის. კოკიშ ცენტრის მილარე პლატო, ნამუშ სიმაღალა 30-35 მეტრიე, არძაშე უმაღალაშ კონკა რე - გვალა ედ-დუჰანი.

ქიანას კლიმატი სქირე რე, ტროპიკული. დიდ კოკეფს დო წყარპიჯიშ ზონეფს ზუღაშ ქვინჯიშე ეშმასოფუნს ოშუმალი წყარიშ წყურგილეეფი. ბაჰრეინიშ ტერიტორია უმენტაშო ტიოზეფს უკინებუ. ზუღაშ წყარს მიარე მარჯანეფიე. ბაჰრეინი მილარე ტროპიკულ არიდულ კლიმატურ ზონას. ზოთონჯი ტიბუე (ღურთუთაშ ოშქაშე ტემპერატურა - +17° С), ზარხული ძალამი ჩხე რე (კვირკვეშ ოშქაშე ტემპერატურა - +40°С). წანამოწანას ოშქაშეთ 90 მმ ნოლექი გუნმურს.

Phoenicopterus roseus (დიდი ფლამინგოეფი) ბაჰრეინს.

ბაჰრეინიშ არქიპელაგიშ ფლორა (წვანე ოფორე) ალაზიმაფათ შხავდოშხვანერიე. ტიოზეფს ჩანს თიჯგუა გოლოფაგუმარძინე ჩანარეფი მუნერით რე - საკსაული, აქლემიშ ძიგირი, ტამარისკი, ასტრაგალი დო შხვა. გრუნტიშ წყარეფიშ დიხაპიჯიშ ეშალუეფს იდვალუაფუ ოაზისეფი ფინიკიშ პალმეფით დო შხვა კულტურული ჩანარეფით. დაღარი ფაუნას მილარე - მაფურინჯეფი, მაღირღონალეფი დო ხოხუეფი. ქიანაშ წყარპიჯეფს დოხოლაფირო 400 გვარობაშ ჩხომი დინოხე, თენეფ შქას ორეწუე ჩხომეფი ხოლო. გოფაჩილიე ზუღაშ კორკილეფი. მარჯანიშ რაქეფი ეფშა რე ზუღაშ ღაჭაჭიეფით, ომარეფით, მოლუსკეფი, თენეფ შკას მირგატიშ მოლუსკეფი. შხვადოშხვა მარჯანიშ მიარე გვარობა (2000 გვარობაშე მეტი).

ადმინისტრაციული გორთუალა

[რედაქტირაფა | წყუშ რედაქტირაფა]

ბაჰრეინი ირთუ 5 მუხაფაზათ:

  • ნანანოღაშ მუხაფაზა
  • ცენტრალური მუხაფაზა
  • მუხაფაზა მუჰარრაკი
  • ოორუე მუხაფაზა
  • ობჟათე მუხაფაზა

2002 წანაშ 3 კვირკვეშახ, ბაჰრეინი ირთუდჷ 12 მუნიციპალიტეტო:

  • ალ-მანამა (Al Manamah)
  • ალ-მინტაკა ალ-ბუსტა (Al Minţaqah al Wusţá)
  • ალ-მინტაკა ალ-ღარბია (Al Minţaqah al Gharbīyah)
  • ალ-მინტაკა ალ-შამალიაА (Al Minţaqah ash Shamālīyah)
  • ალ-ხადი
  • არ-რიფა ვა ალ-მინტაკა ალ-ჯანუბია
  • ჯიდი ჰაფსი
  • ჯუზურ ჰავარი
  • ისა, მუჰარაკი
  • სიტრა
  • ჰამადი

ბაჰრეინიშ მახორობაშ კულტურა ინწრასიე მიკორსხილი ისლამურ ტრადიციეფს. ამდღანერდღარი ლიტერატურა, ბაჰრეინიშ ჯარალუაშ სოციალურ დო პოლიტიკურ სინანდულეს ოძირანს. ბაჰრეინიშ ოგიმოგონებუე ხელუანობა გიშეგორუაფუ მუშ ,,ზოხორინელი ბაჰრეინული სტილით" ფერჭარუას დო ქარგუას. ბაჰრეინიშ თარ ოქინაფუეფშა მიშმურს ისლამური არქიტექტურაშ შედევრეფი - ობიშხაშ დიდი მეჩეთი მანამას, ყურანიშ ჸუდე, ნაციონალური მუზეუმი.

2006 წანაშ 1 ეკენიაშე, ბაჰრეინქ დოთირუ ოფიციალური მოსვანჯაშ დღალეფი ცააშხა დო ობიშხაშე, ობიშხა დო შურიშახაშა, მუშ ღანკით რდჷ შხვა ქიანეფწჷკმა მარაშ ციკლიშა დოხოლაფა. ბაჰრეინიშ ვარელიგიური დღალეფი:

  • 1 ღურთუთა — ახალი წანა
  • 1 მესეფი — ხანდაში დღა
  • 16 ქირსეთუთა — ერუანული დღა
  • 17 ქირსეთუთა — მაფათ კურთხუაშ დღა

2004 წანაშე ქიანას იმანჯებუაფუ ბაჰრეინიშ ფორმულა-1-იშ გრან-პრი, ნამუშ შარათ დოგაფილიე სახენწჷფო ავტოდრომიშ ცენტრალურ ნორთის - ტიოზი საჰირიშ ოშქაშეთ.

2008 წანაშ გერგობათუთას ბაჰრეინს იმანჯჷ სნუკერიშ ტურნირქ, ნამუქუთ სეზონიშ ტურნირეფიშ ორეიტინგე რიცხუშა მიშართუ.

აკოანჯარაფილი ნძალეფი

[რედაქტირაფა | წყუშ რედაქტირაფა]
ნოში RBNS Sabha FFG-90 ბაჰრეინიშ ომაფეშ ოზუღე ნძალეფი

ბაჰრეინს ვართფერი დიდი, მარა ჯგირო აკოანჯარაფილი ბაჰრეინიშ დუდთხილუაშ ნძალეფი ჸუნს. თარო აკოანჯარაფილი რენა აშშ-ს წარმებული აკონჯარუათ (ფურინჯეფი F-16, F-5, ვერტმაფურინჯეფი UH-60, ტანკეფი M60, დო ფრეგატი ოლივერ ჰაზარდ პერი RBNS Sabha-შ კლასიშ). ბაჰრეინიშ თარობაქ აპიჯაფა დოდუ ააშ-იშ აკოანჯარაფილ ნძალეფწჷკუმა ართო ხანდუაშე დო 1990-იანი წანეფიშ დაჭყაფუშე აკოართაფილ შტატეფს ბაზას არძენს ჯუფეირს. თე ბაზას იდვალუაფუ ააშ-შ აკონჯარაფილი-ოზუღე ნძალეფიშ ცენტრალური ოდუდალე (მახუთა ფლოტიშ ოდუდალე).

XX ოშწანურაშ დაჭყაფუს ისლამური სკოლეფი (ქუთაბეფი) რდჷ გონათუაშ ხვალე ართი ფორმა ბაჰრეინს. თენეფი რდჷ ტრადიციული სკოლეფი, სოდეთ ბაღანეფს დო ახალმარდუეფს ყურანიშ კითხირს ოგურუანდეს. მაართა მოსოფელიშ ლჷმაშ უკული ბაჰრეინს ბჟადალიშ გოლინათ დარსხუ ამდღარდღარი ოგონათაფე გოჭყაფილობეფქ.

მასობური ინფორმაციაშ მეშქაშალობეფი

[რედაქტირაფა | წყუშ რედაქტირაფა]

ქიანას მასიური ტირაჟეფით არაბულ დო ინგლისურ ნინეფშა გიშმურს ვითურშე უმოს პერიოდული გიშაშქუმალუეფი. დახე არძა პოლიგრაფიული გოჭყაფილობეფი იდვალუაფუ ქიანაშ ნანანოღას, მანამას. არძაშე უმოს რჩქინელი ირდღალური გაზეთეფიე: ,,ალ-აიამი" (,,დღალეფი", 37 ვითოში ეგზემპლარი), ,,ახბარ ალ-ხალიჯი" (,,ჸუჯიშ ციორი", 25 ვითოში ეგზ.), ,,გალფ დეილი ნიუს" (20 ვითოში ეგზ.). მანამას მილარე სპარსეთიშ ჸუჯიშ ქიანეფიშ ოინფორმაციე ოაგენტეეშ შტაბ-ორენჯი (ბაჰრეინი, ერაყი, ყატარი, ქუვეითი, არაბეფიშ გოართოიანაფილი საემიროეფი, საუდიშ არაბეთი), ნამუქჷთ დირსხუ 1978 წანას. ქიანას უჭყაფულენს რადიო მონტე-კარლო დუალია (არაბული ომოინალე).

ბაჰრეინი ოლიმპიურ ლაჸაფეფს

[რედაქტირაფა | წყუშ რედაქტირაფა]

1984 წანაშე, ბაჰრეინი ოკათჷდჷ 7 ზარხულიშ ოლიმპიურ ლაჸაფეფს, მარა ართშა ხოლო ვაუკათინჷ ზოთონჯიშ ოლიმპიურ ლაჸაფეფშა. ბაჰრეინშე ხვალე ართი ოლიმპიური პრიზიორი რე მარიამ იუსუფ ჯამალი - 2012 წანას, ლონდონს, მიგჷ ბრონზეშ მედალი ქექე ათლეტიკას.

ნოღეფი მუჰარაქი (წოხოლენი აბანი) დო მანამა (უკახალენი აბანი).

ბაჰრეინს წარმოწანას ოსურუ 8 მილიონშე უმოს ტურისტი. ტურისტეფიშ უმენტაშობა - მეძობელ არაბული ქიანეფიშ მახორუეფი რენა. ბოლო პერიოდის შხვა რეგიონეფშე ტურისტეფიშ მუდანობა ირდუ. ტურისტეფი თე ქიანაშა მოულა ბაჰრეინიშ ისტორიული მონძალაშ ოძირაფუშა, ლიბერალური სახენწჷფოშ დო ქიანაშ ჯგირი რეპუტაციაშ გეშა.

ბაჰრეინიშ ომაფე აკმაშქვანს არაბულ კულტურას, სპარსეთიშ ჸუჯიშ ბარჩხალს დო ხუთი ვითოში წანაშ ცივილიზაციაშ არქეოლოგიურ მონძალას. ბაჰრეინს იდვალუაფუ მუსხირენ რანწკი ჯიხაზურგეფი, კერზოთ, კალატ-ალ=ბაჰრეინი, ნამუთ იუნესკოშ მოსოფელიშ მონძალაშ ერკებულშა მიშმურს. ბაჰრეინიშ ნაციონალური მუზეუმი თხილანს თე ქიანას ადამიერიშ მუკორჩქინაშე 9 ვითოში წანაშ წოხოლე შაყარელი მატერიალურ კულტურაშ მეკონეფს.

რესურსეფი ინტერნეტის

[რედაქტირაფა | წყუშ რედაქტირაფა]
  1. ↑ Constitution of the Kingdom of Bahrain (Issued in 2002) and Its Amendments (Issued in 2012). National Institute for Human Rights. კითხირიშ თარიღი: 31 August 2020.
  2. ↑ Bahrain Country Study Archived 18 April 2023 ვებ-ხასჷლას Wayback Machine. Library of Congress
  3. ↑ Facts & Figures. კითხირიშ თარიღი: 3 January 2024.
  4. ↑ Report for Selected Countries and Subjects: October 2024. International Monetary Fund. კითხირიშ თარიღი: 22 October 2024.
  5. ↑ Bahrain 2020 Census (28 February 2021). კითხირიშ თარიღი: 5 April 2021.
  6. ↑ Bahrain – the World Factbook (19 October 2021). კითხირიშ თარიღი: 24 January 2021.
  7. ↑ Area of Bahrain Expands to 765.3 square kilometres. კითხირიშ თარიღი: 1 February 2018.
  8. ↑ Oman: The Lost Land Archived 6 October 2014 ვებ-ხასჷლას Wayback Machine. . Saudi Aramco World. Retrieved 7 November 2016.
  9. ↑ EB (1878).
  10. ↑ The history of British involvement in Bahrain's internal security (en). კითხირიშ თარიღი: 7 July 2021.
  11. ↑ “Bahrain says ban on protests in response to rising violence“, CNN, 1 November 2012. კითხირიშ თარიღი: 16 November 2012. 
  12. ↑ “How Bahrain uses sport to whitewash a legacy of torture and human rights abuses“. კითხირიშ თარიღი: 19 July 2018. 
  13. ↑ “Bahrain: Reform-Promise and Reality“, J.E. Peterson, p. 157. კითხირიშ თარიღი: 23 February 2014. 
  14. ↑ Bahrain's economy praised for diversity and sustainability. Bahrain Economic Development Board. კითხირიშ თარიღი: 24 June 2012.
  15. ↑ Bahrain (en-US). კითხირიშ თარიღი: 7 July 2021.
  16. ↑ Shanghai Cooperation Organisation. კითხირიშ თარიღი: 1 September 2023.
  17. ↑ Bahrain granted the status of SCO dialogue partner (15 July 2023). კითხირიშ თარიღი: 1 September 2023.
გორილი რე "https://xmf.wikipedia.org/w/index.php?title=ბაჰრეინი&oldid=240632"-შე