სუვა (ინგლ. Suva) — ფიჯიშ ნანანოღა, ქიანაშ ეკონომიკური, პოლიტიკური დო კულტურული ცენტრი. სუვაშ მახორობა 2017 წანაშ ეჭარუაშ მეჯინათ 93,970 ადამიერს აკმადგინანდჷ[1], დო თიში აგლომერაციას ოხორანს 185,913 ადამიერი. ნოღა ცენტრალური ოლქიშ რევაშ პროვინციას იდვალუაფუ.
სუვა — ოკიანეთიშ ობჟათე ნორთიშ უდიდაში ნოღა რე ავსტრალიაშ დო ახალი ზელანდიაშ ფარგანეფს გალე. ქიანაშ თარი ოზუღე ონიშოლი რე.
ნოღა სუვა კოკი ვიტი-ლევუშ ობჟათე-ბჟაეიოლ წყარპიჯის, მორჩილ ჩქონს იდვალუაფუ. ჯვეშო ნოღაშ შანულამი ნორთი ჭყენჭყის უკებუდჷ.