პასპორტი

ვიკიპედია-შე
გეგნორთი: ნავიგაცია, გორუა

პასპორტი (ლათ.  passus (ყარაფი) დო porta (ფარდიკარი)) — პირადობაშ დო მენოღალეშ დჷმადასურაფალი სახენწჷფო დოკუმენტი სახენწჷფოეფიშ ხურგეფიშ გინულაშ დო ხურგაშგალე რინაშ ბორჯის. პასპორტი შანენს სახენწჷფოშ მენოღალეთ ჸოფას, მარა თენა ვაშანენს, ნამჷ-და პასპორტიშ მაღვენჯი უციოთ ოხორანს თე პასპორტიშ მემაჩამალი ქიანაშ ტერიტორიას.

პირადობაშ დჷმადასურაფალ დოკუმენტეფს გიშმაგორჷნა ჟირ სახეშ დოკუმენტის, თენა რე კინ მუ პასპორტი დო პირადობაშ დჷმადასურაფალი მოწმობა. კანკალე ქიანას (სამანგ. კორეაშ ოკათე დემოკრატიული რესპუბლიკას, უკრაინას დო რუსეთის) პირადობაშ დჷმადასურაფალი მოწმობაშ მანგიორო, გინიჩამუ „დინოხოლენი პასპორტი“. უმენტაშ ქიანას, პასპორტი რე სახენწჷფოშ დინოხოლენი თარი პირადობაშ დჷმადასურაფალი მოწმობა (სამანგ. ბელარუსი). თიჯგურა ქიანეფს, მუჭომეფით რე საქორთუო, საფრანგეთი, ლიტვა, სლოვაკეთი დო თ.უ. სახენწჷფოშ დინოხოლენი პირადობაშ დჷმადასურაფალი მოწმობა წჷმარინუანს პლასტიკური ბარათიშ ფორმაშ ბიომეტრიულ დოკუმენტის, პასპორტიშ ეჭოფუა — ნება ჸოფუობათ რე.

პასპორტი ვიზუალურო რე ბუკლეტიშობური დოკუმენტი, ნამუსჷთ წჷმორინაფილი რე ვიზეფი (ვარე გოფორმაფილი უვიზე რეჟიმი-და), ნამუთ ქიანაშ მინულაშ ოჸიას ირზენს, დო პიჯიშ მაიდენტიფიცერაფალი მუნაჩემეფი (მაღვენჯიშ ჯოხო, სურათი, დაბადებაშ თარიღი, სქესი, მენოღალობა).
პასპორტი გჷმირინუაფუ ედომუშამი მოსოფელს, თეშ გეშა შხვადოშხვა ქიანეფიშ პასპორტეფი მაქსიმალურო უნიფიცირაფილი რე, მუკნაჭარეფი ერუანულ ნინას შხირას იდუბლირებუ ინგლისურ ნინაშა. 21 ოშწანურას მოსოფელიშ მიარე ქიანა გინმურს პასპორტეფიშ ახალ გამნარყშა — ბიომეტრიულ პასპორტშა.
საქორთუოს ბიომეტრული პასპორტეფი 2012 წანაშ პირელშე გინიჩამუ.

მუჭოთ წესი, ქიანეფი ვარენა მუნეფიშ ტერიტორიაშა პიჯიშ მინულას დო გინოყარაფის თი სახენწჷფოშ პასპორტით, ნამუთ ვა რე აღიარაფილი თე ქიანაშითჷნ.

პასპორტიშ ტიპეფი[რედაქტირაფა | წყუშ რედაქტირაფა]

საქორთუოშ მენოღალეშ ორდინარული ბიომეტრული პასპორტი.

ოპასპორტე ტერმინოლოგია უთარაშო სტანდარტიზაფილი რე ედომუშამ მოსოფელს, მარა ქიანეფიშ მეჯინათ პასპორტიშ ტიპეფი, ხასჷლეფიშ მუდანობა დო გოთანჯუა შილებე ართიანშე გინორთელი ორდასჷნ. რსებენს პასპორტეფიშ გეჸვენჯი ტიპეფი:

ორდინალური პასპორტი (Ordinary passport)
გინიჩამუ რჩქვანელობურ მენოღალეეფშა, ნამუთ ხურგაშგალე მეულან.
ოინალური დო ოფიციალური პასპორტი (Official passport)
გინიჩამუ მენოღალეეფიშ გიშაკერძაფილი კატეგორიაშა, ნამუეფსჷთ ვაუღჷნა დიპომატიური იმუნიტეტი. საქორთუოშ კანონდვალაშ მეჯინათ, ოინალური პასპორტი მიაჩამუ: ცენტრალური ოგიშაგორუე კომისიაშ, პარლამენტიშ, ოკონსტიუციე დო უჟინაში სასამარათალოშ, ოკათე მათხილარიშ, გენერალური პროკურორიშ დო სახენწჷფო კანცელარიაშ კანკალე წორომახანდეს დო თაშნეშე კანკალე შხვა პიჯის.
ააშ-იშ დიპლომატიური პასპორტი.
დიპლომატიური პასპორტი (Diplomatic passport)
მიაჩამჷნა დიპლომატეფს, საკონსულოშ წორომახანდეეფს დო თინეფიშ ფანიაშ მაკათურეფს. დიპლომატიური პასპორტიშ ღვენა ავტომატურო ვაუნარღელჸოფენს დიპლომატიური იმუნიტეტიშ ღვენას. დიპლომატიშ სტატუსის დო დიპლომატიურ იმუნიტეტის პიჯის მეთმეჩანს მემაღებე სახენწჷფოშ დორხველური კანონდვალაშ დო საირქიანო დიპლომატიური კონვენციეფიშ დოჸუნათ, თე სახენწჷფო ქორე თე კონვენციეფიშ მაკათური-და. დიპლომატიური პასპორტიშ ღვენა თაშნეშე ვაშანენს უვიზე მინულაშ შილებუამობას შხვა ქიანაშ ტერიტორიაშა. თიშ უმკუჯინალო, რჩქვანელობურ მენოღალეს დო ტურისტეფს შეულებჷნა უვიზე მეულ-მოულათ ირგებუანი-და, დიპლომატიურ პასპორტიშ მაღვენი პიჯეფშო ოხვილური რე დიპლომატიური ვიზაშ ეჭოფუა. საქორთუოშ კანონდვალათ, დიპლომატიური პასპორტით რგებულენა მაღალი პოსტეფს მარენჯი პიჯეფი, თინეფს შქას საქორთუოშ პრეზიდენტი დო თიში ჩილი.
ობორჯე პასპორტი (Emergency or temporary passport)
ობორჯე პასპორტი გინიჩამუ თარი პასპორტიშ დინაფაშ ვარდა ხირუაშ შვანს. საქორთუოშ ტერიტორიას ობორჯე პასპორტიშ ფუნქციას არსულენს პირადობაშ ობორჯე მოწმობა.
მეზუღალეშ პასპორტი (Seaman's passport)
თენა რე მეზუღალეშ პირადობაშ დჷმადასურაფალი დოკუმენტი, ნამუშათ თაშნეშე მიშეღალუაფუ მუნაჩემეფი მეზუღალეშ ნიშიშ ოხანდე საქვარუა, ნიშუაშ სტაჟიშ დო მეზუღალეშ სინთელუანობაშ გეშა. საქორთუოშ ტერიტორიაას მეზუღალეშ პასპორტიშ ფუნქციას მეზუღალეშ წინგაკი არსულენს.
კოლექტიური პასპორტი (Group passport)
მიაჩამუ გოთანჯილი პიჯეფიშ ბუნას, ნამუეფჷთ ართო შარალენა, სამანგათ, მაგურაფუეფიშ ბუნა მარწაფალიშ დუდალათ.
ოფანიე პასპორტი (Family passport)
გინაჩამუ მოშარეშ ფანიაშ მაკათურეფს — მუმა, ნანა, ალმასქუ ვარდა ალმასქუეფს, სქუალეფი. ოფანიე პასპორტი მიაჩამუ ართ-ართი პიჯის. თე პიჯი შილებე შარალუენდას, ხვალე, პასპორტის მეწურაფილი არძა ვარდა კანკალე ფანიაშ მაკათურწკჷმა ართო.
გოეროშ პასპორტი, მუჭოთ ლესე-პასე პასპორტიშ სამანგა
ლესე-პასე (Laissez-Passer)
ოშარალუე დოკუმენტი (Travel document), ნამუთ ვარე ერუანული პასპორტი, მარა არსულენს პასპორტიშ ფუნქციას. გინიჩამუ საირქიანო ორგანიზაციეფიშით მუნეფიშ წორომახანდეეფშო (სამანგათ, გოეროშ პასპორტი) ვარდა თარობაშით.
ურცხოალიშ პასპორტი (Alien's passport)
რე დოკუმენტი, ნამუთ ვარე ერუანული პასპორტი, მარა არსულენს პასპორტიშ ფუნქციას კანკალე შვანს, სამანგათ მენოღალობაშ უღვენობაშ შვანს (შხირას მუთმოხვადუ ესტონეთის ლატვიას დო დანიას), ვარდა ვამენოღალე-რეზიდენტშა (ჩეხეთიშ ვამენოღალეშ პასპორტი).
საქორთუოშ ტერიტორიაშა ურცხოალიშ პასპორტიშ ფუნქციას იროიანი ვარდა ობორჯე ხორინიშ მოწმობა არსულენს.
დინოხოლენი პასპორტი (Internal passport)
თარი დოკუმენტი, ნამუთ მოწმენს ნამუდგაინი სახენწჷფოშ მენოღალობას ვარდა სახენწჷფოშ ტერიტორიას. საქორთუოშ ტერიტორიას დინოხოლენი პასპორტიშ ფუნციას საქორთუოშ მენოღალეშ პირადობაშ მოწმობა არსულენს.
ბეჩა მენოღალეშ პასპორტი (Honorary citizen's document)

რე დოკუმენტი, ნამუთ ვარე ერუანული პასპორტი, გინიჩამუ სახენწჷფოშ ვარდა ორგანიზაციაშით გიშაკერზაფილი დოინალობეფშო, მუჭოთ წესი, ვამენოღალეეფშა. ააშ-შ ბეჩა მენოღალეშ პასპორტი ვარდა მოსოფელიშ პასპორტი.

კომუფლირაფილი პასპორტი (Camouflage passport)
კომუფლირაფილი პასპორტიშ სამანგა
თე მაღალ პოლიგრაფიულ დონეშა რსულებური დოკუმენტი უდასურენს მუში მაღვენჯს თი ქიანაშ მენოღალობას, ნამუთ უკვე ვაარსებენს ვარდა ვართ დღას არსებენდჷნ. მუსხირენ ქიანას, არსებენა ფირმეფი, ნამუეფით თეჯგურა პასპორტეფიშ ბეშტუათ რენა დოკაფილი. უშქურანჯობაშ ნინალეფი შხირას თეჯგურა ფირმეფს ტერორისტეფიშ დო დუმაშებუეფიშ ხეშენწყუალას აბრალენა. მარა, თეშ უმკუჯინალო, კომუფლირაფილი პასპორტეფიშ აკოქიმინუა, გოფორმაფა, ჸიდირი დო გოშხვაშაფა ვარაფილი ვარე კანონდვალათ, თიშენ ნამჷ-და, კომუფლირაფილი პასპორტი მუში მაღვენჯს ვემიაჭაარანს ნამდგაინი რსებული ქიანაშ მენოღალობას. კომუფლირაფილი პასპორტით სახენწჷფო ხურგიშ გჷნოჭკირუაშ ცადება არძა ქიანას ოსაჯებე ქიმინჯობა რე. კომუფლირაფილი პასპორტიშ ართ-ართ ნერგვარობას წჷმარინუანს ფანტასტიკური პასპორტი.
ფანტასტიკური პასპორტი (Fantasy passports)
ფანტასტიკური პასპორტი, თეშ მუჭოთ კომუფლირაფილი, ვარე აღიარაფილი აკა ქიანაშით დო თე დოკუმენტით სახენწჷფოშ ხურგიშ გინოჭკირუა ვარაფილი რე. ფანტასტიკური პასპორტი კომუფლირაფილი პასპორტშე გინორთელი რე თით, ნამჷ-და ფანტასტიკურ პასპორტის დორხველური ჯოხოთ აკეთენა დო გინმოჩანა რეალურო რსებული ვასათარობო ორგანიზაციეფი, ბუნეფი ვარდა ფონდეფი. კანკალე შვანს, ფანტასტიკური პასპორტიშ კეთებაშ ღანკი რე თე ორგანიზაციაშ რეკლამიარაფა. შხვა შვანს ეშანილი პასპორტი რე უბრალე ციგანობა ვარდა სუვენირი.

თშნეშე ქოძირით[რედაქტირაფა | წყუშ რედაქტირაფა]

გალერეა[რედაქტირაფა | წყუშ რედაქტირაფა]

Commons-logo.svg
ვიკიოწკარუეს? რე ხასჷლა თემაშენ:

სქოლიო[რედაქტირაფა | წყუშ რედაქტირაფა]